Sin las vias dal Grischun hai dà l'onn 2025 tut en tut 2350 accidents da traffic. En quests accidents èn mortas 6 persunas e vegnidas blessadas 592 persunas. Il dumber d'accidents cun motos è s'augmentà. Il dumber d'accidents da traffic sut l'influenza d'alcohol è sa reducì.

L'onn 2025 ha la polizia registrà totalmain 2350 accidents da traffic en il chantun Grischun. Quai èn pli paucs accidents che l'onn avant.

Sveltezza memia auta e distracziun sco ristgas
Anc adina èn sveltezzas memia autas in tema en connex cun ils accidents da traffic en il chantun Grischun. Betg en tut ils cas n'èsi stà uschia, che la sveltezza maximala legala è vegnida surpassada. En tscherts cas n'è la sveltezza er betg stada adattada a las cundiziuns sin via u a la visibilitad. Il dumber d'accidents da traffic pervia da distracziun u d'inattenziun è s'augmentà en cumparegliaziun cun l'onn precedent. In'activitad da controlla en quests secturs vegn ad esser necessaria er en l'avegnir.

Diminuziun dals accidents cun donns da persunas
In fatg legraivel è, ch'ins dastga registrar ina clera diminuziun dals accidents cun persunas mortas en cumparegliaziun cun l'onn precedent. Quai è la valur la pli bassa, sch'ins cumpareglia ils ultims 10 onns.

Tar ils accidents cun donns da persunas han ins pudì registrar ina leva diminuziun. Er il dumber da persunas grevamain blessadas è sa reducì. Ina tendenza creschenta ston ins constatar tar ils accidents da traffic entaifer ils abitadis. Percunter hai dà ina reducziun dal dumber d'accidents da traffic ordaifer ils abitadis.

Reducziun dals accidents sut l'influenza d'alcohol
Tar ils accidents da traffic sut l'influenza d'alcohol han ins pudì constatar ina reducziun. Da valitar da maniera negativa è percunter il fatg, ch'il dumber d'accidents da traffic sut l'influenza da narcotics è creschì. En il traffic stradal fa la Polizia chantunala dal Grischun regularmain controllas cun differentas prioritads.

Dapli accidents cun motos e cun velos, dentant damain accidents da peduns
Il dumber d'accidents cun motos è creschì en cumparegliaziun cun l'onn precedent. Malgrà che questas cifras èn s'augmentadas, han ins pudì registrar ina reducziun dal dumber da persunas grevamain blessadas tras accidents cun motos. L'onn passà èn creschids ils dumbers d'accidents cun velos sco er cun e-bikes.

La statistica detagliada dals accidents da traffic dal chantun Grischun po vegnir consultada en l'internet sut www.kapo.gr.ch > Rumantsch > Servetschs > Statistica.