L'onn 2025 hai dà en il chantun Grischun tut en tut 13 235 delicts registrads (onn precedent: 12 599). La cumpart dals delicts tenor il Cudesch penal (CP) importa 79,4 pertschient.

Tranter ils 10 508 delicts tenor CP domineschan ils delicts da facultad (65,1 %), suandads dals delicts cunter la libertad (20,1 %) e cunter il corp e la vita (4,9 %). La quota totala da scleriment importa 44,0 pertschient (onn precedent: 42,5 %). Spezialmain aut è il scleriment da delicts cunter il corp e la vita (92,3 %) sco er da delicts sexuals (93,2 %).

Il 2025 n'è vegnì registrà nagin delict da mazzament accumplì, dentant in delict da mazzament empruvà. Ils grevs delicts da violenza èn s'augmentads (57 cas; onn precedent: 39), tranter quels 40 grevas blessuras corporalas e 16 violaziuns. 14 violaziuns hai dà en il sectur da la violenza a chasa. Tut en tut èn vegnids registrads 260 cas da violenza a chasa. Cun la revisiun da la Lescha da polizia sco er cun l'introducziun dal post spezialisà Management da smanatschas per il 1. da schaner 2026 definescha la Polizia chantunala dal Grischun la tematica sin plaun structural uschia, ch'ella survegn ina anc pli gronda prioritad en il futur.

Ils delicts da facultad èn s'augmentads levamain sin 6840 cas (onn precedent: 6704). Ils enguladitschs cun infracziun èn s'augmentads cleramain (593; onn precedent: 499). La criminalitad digitala è creschida sin 1237 cas, 43 pertschient da quels èn engions.

Las cuntravenziuns cunter la Lescha da narcotics èn s'augmentadas sin 894 cas (onn precedent: 721). Tut en tut èn vegnids registrads 69 causals criminals. En cumparegliaziun cun l'onn precedent resulta in augment da 47 %. Quest augment è resultà cunzunt pervia dal cumbat sistematicamain pli intensiv cunter il commerzi cun drogas.

Las cuntravenziuns cunter la Lescha federala davart las persunas estras èn diminuidas a 238 cas (onn precedent: 292).

Statistica criminala 2025