Entant che bleras persunas giaudan lur vacanzas da stad, nizzegian laders ed infracturs sistematicamain il temp da vacanzas. Abitaziuns e chasas vidas porschan occasiuns per enguladitschs cun infracziun – er en vitgs pli pitschens ed en regiuns perifericas. La Polizia chantunala dal Grischun recumonda simplas mesiras da prevenziun per proteger l'agen dachasa e l'atgna proprietad.

Tgi che va en vacanzas, duess far finta d'esser a chasa: Ina chascha da brevs vida, plantas tgiradas u controllas regularas da vischins han in effect da decuraschament. Las portas e las fanestras èn da serrar consequentamain, cura ch'ins banduna la chasa – er durant curtas absenzas u la notg. Il medem vala per vehichels, ch'èn – tenor lescha – da serrar giu, per ch'els na possian betg vegnir utilisads da persunas nunautorisadas. Objects da valur na duain betg vegnir mess visiblamain en il vehichel.

Er velos ed e-bikes èn da liar cun ina serradira d'auta qualitad vi d'in object fix u da deponer en localitads serradas. En bogns averts, restaurants, ustarias e negozis ston ins plinavant far attenziun d'enguladitschs ord tastga. Objects da valur èn adina da purtar datiers dal corp e mai da laschar senza surveglianza.

La Polizia chantunala dal Grischun recumonda ultra da quai da far attenziun da persunas u vehichels suspectus en quartiers d'abitar e d'annunziar las observaziuns correspundentas al clom d'agid da la polizia 117.

Cun far attenziun, cun sa gidar tranter vischins e cun segirar consequentamain las chasas, ils vehichels ed ils velos pon ins impedir blers enguladitschs. La Polizia chantunala dal Grischun giavischa a la populaziun ed als giasts vacanzas da stad segiras e recreativas.