La Polizia chantunala dal Grischun ha duas novas polizistas e 23 novs polizists. Suenter dus onns da scolaziun han els fatg cun success l'examen professiunal federal. Gievgia èn els vegnids prendids si uffizialmain en il corp da polizia, quai en il rom d'in act festiv en preschientscha da lur famiglias e da giasts.

Cun l'empermischun che las persunas novsaramentadas han dà al cumandant Walter Schlegel, han ellas empermess d'observar la Constituziun, las leschas e la discreziun d'uffizi sco er da tractar tut las persunas da medema maniera.

En ses pled ha il cumandant Walter Schlegel undrà las prestaziuns da las polizistas e dals polizists sco er la contribuziun da lur ambient social durant la scolaziun pretensiusa. El ha accentuà, che buna lavur da polizia na saja mai l'ovra da singulas persunas. Ella sa sviluppia en il team, tras la confidenza vicendaivla, ina communicaziun averta e la prontezza da s'engaschar in per l'auter. A medem temp ha el fatg endament a las novas appartegnentas ed als novs appartegnents da la polizia la responsabladad particulara da lur professiun: «Sco appartegnentas ed appartegnents da la Polizia chantunala represchentais vus il stadi e ses monopol da pussanza. Las cumpetenzas che vus avais survegnì, èn necessarias per garantir segirezza e per far valair il dretg. Ellas èn però adina liadas a la lescha, a la commensurabladad ed a la responsabladad.»

Il cusseglier guvernativ Peter Peyer ha undrà la buna terminaziun da la scolaziun da polizia ed ha accentuà l'impurtanza da la lavur poliziala per la segirezza en il chantun Grischun: «Jau gratulesch da cor a las novas polizistas ed als novs polizists e giavisch ad ellas ed els bler success e satisfacziun per lur activitad plain responsabladad.»

Midada en la direcziun ed en la Polizia da regiuns e da traffic
Er en la direcziun datti midadas persunalas: Dapi il 1. da settember 2026 maina Lukas Christen la Polizia da regiuns e da traffic. L'um da 43 onns ha surpiglià la plazza da Peter Joos ch'è daventà vicecumandant en il Commando da polizia. Sco nov schef da la Polizia da traffic è vegnì elegì Anton Rettich che ha 54 onns; el cumenza sia plazza il 1. da december 2026. Plinavant èn vegnids beneventads trais novs appartegnents da la polizia, dus assistents da segirezza sco er tschintg collavuraturas e collavuraturs civils. Els han cumenzà durant l'onn lur lavur tar la Polizia chantunala dal Grischun.