Champ d'incumbensas

Ti lavuras al Plantahof a Landquart. Qua emprendas ti tut davart la cultivaziun da grondas culturas da fritga e da pumaraida, davart l'elavuraziun dal terren e davart la tgira da bostgs.

Tias fermezzas èn:

• plaschair da lavurar en il liber
• constituziun corporala robusta
• perseveranza e resolutezza
• bun dun d'observar quai che capita en la natira
• chapientscha tecnica per maschinas e per urdains
• inschign manual
• senn da responsabladad
  

 

Accents da la scolaziun

Ti emprendas, quant impurtant ch'il lieu adattà è e tge consequenzas che la tscherna da las sorts da fritga e da las tecnicas da producziun ha per la racolta. Ti elavuras il terren, fas emplantaziuns, taglias e tgiras bostgs. Ti creeschas bunas cundiziuns da viver per insects utils e cumbattas cunter insects nuschaivels en moda efficazia, ma tuttina ecologica. Suenter la racolta zavras ti la fritga, l'emballeschas u la preparas per la magasinaziun. Bleras lavurs (ladada, tgira dal terren e protecziun da las plantas) vegnan fatgas cun maschinas. Il tagl dals bostgs e la zavrada qualitativa da la fritga vegnan fatgs a maun. En quest connex èsi impurtant che ti observias las prescripziuns da segirezza.

 

Scolaziun

Durada:	3 onns
Scola:	1./2. onn d'emprendissadi: 1 di per emna 3. onn d'emprendissadi: 2 dis per emna (Strickhof, Lindau) La furmaziun da basa po er vegnir absolvida cun l'agricultura biologica sco tema central. En cas da fitg bunas prestaziuns en scola po vegnir frequentada la scolaziun da maturitad professiunala en moda cumplementara a l'emprendissadi. differents curs intermanaschials
Finiziun:	attestat federal da qualificaziun "pumicultur/pumicultura AFQ"

 

Pretensiun

• scola populara terminada
• examen dad ir cun tractor (far sche pussaivel avant che cumenzar cun la furmaziun da basa) 
• cun in attest federal da furmaziun professiunala agricula AFP u cun in attestat federal da qualificaziun AFQ d'ina autra professiun u cun in examen da maturitad sa reducescha la scolaziun per regla a 2 onns

 

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:

• curs dal Strickhof, da scolas spezialisadas superiuras sco er da posts chantunals spezialisads e da scolas d'agricultura
• suenter la finiziun da la furmaziun da basa po vegnir absolvida ina furmaziun da basa scursanida dad 1 onn en in'autra professiun agricula
• mainagestiun da pumicultura u d'agricultura cun certificat professiunal federal u in auter examen professiunal en il champ professiunal da l'agricultura; spezialista/spezialist da commerzi en detagl cun certificat professiunal federal
• maistra/maister da pumicultura, maistra pura/maister pur u in auter examen professiunal superiur en il champ professiunal da l'agricultura
• agrotecnicra/agrotecnicher SSS dipl., commerzianta/commerziant d'agricultura SSS dipl.
• bachelor of science (SAS) en agronomia, bachelor of science (SAS) en inschigneria da l'ambient (p.ex. approfundaziun en agricultura biologica ed en orticultura biologica)