Champ d'incumbensas
Ti lavuras tar in u tar differents posts da servetsch, sustegnas la transfurmaziun digitala ed analiseschas activitads, process e products dal post da servetsch. Silsuenter elavureschas ti soluziuns per optimar process da lavur sco er products digitals e ti es il liom tranter las utilisadras ed ils utilisaders, ils aspects economics e las spezialistas ed ils spezialists tecnics.

Tias fermezzas èn:

• abilitad da communitgar
• dun organisatoric
• chapientscha tecnica
• pensar abstract-logic
  

Accents da la scolaziun

Ti lavuras en il team ed accumpognas projects pitschens ensemen cun sviluppadras e sviluppaders d'applicaziuns, informaticras ed informatichers d'economia, contabilistas e contabilists u persunas spezialisadas per il svilup da l'interpresa e ti has contact cun differentas interlocuturas e differents interlocuturs. Sviluppadras e sviluppaders dal business digital pon lavurar en tut ils secturs che realiseschan u planiseschan sia transfurmaziun digitala e participeschan a projects en in grond dumber da secturs: IT, change management, experientscha da clientella, gestiun da l'interpresa, management da chadainas da furniziun, garanzia da qualitad, finanzas e controlling, fatgs da persunal, management da process, marketing u servetschs da stab. En vista a l'augment da la digitalisaziun en la societad ed en vista a la mancanza da persunas spezialisadas èn las perspectivas sin il martgà da lavur bunas. Igl è impurtant da frequentar permanentamain furmaziuns supplementaras per esser infurmà davart tendenzas e davart innovaziuns.‏ Ultra da la scolaziun professiunala èn er la promoziun ed il svilup da la cumpetenza metodica, sociala e persunala parts impurtantas da tia scolaziun. Quai na ta gida betg mo a dumagnar las differentas pretensiuns sin plaun professiunal, mabain er sin plaun interuman.

Dus differents models da scolaziun

• Modus da rotaziun
  En quest model midas ti mintga onn il post da servetsch. A la fin da tia scolaziun has ti uschia ina vasta savida davart l'administraziun chantunala.
• Senza rotaziun
  Scolaziun en in post da servetsch. Durant l'entir temp d'emprendissadi es ti en in post da servetsch ed acquistas uschia ina savida approfundada davart quest post da servetsch.
  
  

Scolaziun

Pretensiun

• scola populara terminada

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras, sco p.ex.

• curs da scolas spezialisadas superiuras e da federaziuns        
• cun certificat professiunal federal: informaticra u informaticher d'economia, sviluppadra u sviluppader d'applicaziuns ICT, tecnicista u tecnicist da sistem e da rait ICT
• managera u manager ICT dipl.
• bachelor of science (SAS) en informatica da manaschi u en informatica ed en sistems da communicaziun