Champ d'incumbensas

Ti lavuras al Plantahof a Landquart. Qua gidas ti a cultivar ers e plantas sco er a tegnair animals per producir charn, latg ed ovs.

Secturs spezials pussaivels
agricultura, culturas spezialas (fritga e legums) u vinificaziun

Tias fermezzas èn:

• plaschair da lavurar cun animals
• chapientscha per connexs da la natira
• abilitads praticas
• chapientscha tecnica (tar il diever da maschinas)
• buna sanadad e buna constituziun fisica (resistenza a l'aura, naginas allergias)
  
  

Accents da la scolaziun

En la cultivaziun dad ers ed en la planticultura tgiras ti las plantas dal semnar fin a la racolta. Ti las protegias cunter malsognas e cunter parasits, das aua e ladim ad ellas e las taglias. En la tegnida d'animals gidas ti a pavlar ed a tgirar ils animals e procuras ch'els sajan suffizientamain al liber, ti gidas a mulscher ed a nettegiar las stallas ed ils stabiliments. En il sectur spezial da la vinificaziun vegn l'iva elavurada a vin. Ti gidas a torclar l'iva, a depositar, ad embuttigliar ed a commerzialisar il vin. 

Scolaziun

Durada:	2 onns
Scola:	1 di per emna a la scola professiunala spezialisada curs intermanaschials davart differents temas
Finiziun:	attest federal da furmaziun professiunala "practicista agrara/practicist agrar AFP"

Pretensiun

• scola populara terminada 

 

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:

• curs da centers da furmaziun e da cussegliaziun agricula davart differents temas
• practicistas agraras/practicists agrars AFP pon far ina furmaziun da basa scursanida cun in attestat federal da qualificaziun (AFQ) en il champ professiunal "agricultura": entrada en il 2. onn da la furmaziun da basa sco pura/pur AFQ, spezialista/spezialist da giaglinom AFQ, pumicultura/pumicultur AFQ, ortulana/ortulan da verdura AFQ, viticultura/viticultur AFQ u tschalerera/tschalerer AFQ

Suenter pon vegnir absolvidas las medemas furmaziuns supplementaras sco per las furmaziuns da basa respectivas cun AFQ.