Champ d'incumbensas

Sco tecnologa u tecnolog da latg elavuras ti al Plantahof a Landquart latg criv a products sco chaschiel, jogurt ed ulteriuras spezialitads da latg da vatga, da chaura e da nursa. Ti utiliseschas indrizs da producziun, surveglias la qualitad e gidas er en la vendita.

Tias fermezzas èn

• Plaschair d'ir enturn cun victualias
• Bun nas e bun gust
• Interess tecnic
• Moda da lavurar conscienziusa e fidada
• Senn per igiena
• Abilitad da supportar squitsch corporal (blera lavur en pe)
• Abilitad da lavurar en in team
• Flexibilitad en connex cun uras da lavur irregularas

Accents da la scolaziun

Durant tia scolaziun emprendas ti, co ch'ins producescha en moda professiunala spezialitads regiunalas da latg e co ch'ins utilisescha e surveglia indrizs da producziun moderns. Ti fas controllas da qualitad e differentas analisas, per ch'ils products correspundian als standards auts. En quest connex èsi impurtant, che ti observias da tut temp las prescripziuns d'igiena e da segirezza. Ultra da quai vegns ti scolada u scolà da cussegliar la clientella e da gidar en la vendita.

Scolaziun

Pretensiuns

• Scola populara terminada

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per avair success en tes futur professiunal. Suenter ta stat a disposiziun in grond dumber da furmaziuns supplementaras, sco p.ex.:

• Examen professiunal (EP): p.ex. cun attestat professiunal federal sco Tecnolog / Technologa da latg u sco Tecnolog / Technologa da victualias
• Examen professiunal superiur (EPS): p.ex. sco Maister signun / Maistra signuna u sco Maister / Maistra da latgiras
• Scola spezialisada superiura (SSS): p.ex. sco Tecnicist / Tecnicista da victualias dipl. SSS
• Scola auta spezialisada (SAS): p.ex. bachelor of science in life sciences u tecnologia da victualias
• Curs e praticums a l'exteriur: per approfundar u per spezialisar en tscherts secturs