L'avantmezdi dals 14 da zercladur 2022 han ins chattà ina chogna da protecziun da muntaneras morta sin la Stutzalp, vischnanca da Valragn. Durant la notg avant han observaziuns directas cumprovà, ch'ils chauns da protecziun da muntaneras ch'eran en acziun, han pudì sa defender cun success cunter l'attatga da trais lufs envers la muntanera da nursas en il territori fitg taiss. La chogna da trais onns ch'è vegnida chattada morta è vegnida suttamessa ad in'analisa patologica da l'Uffizi per la segirezza da victualias e per la sanadad d'animals. L'analisa da l'animal mort e las observaziuns al lieu inditgeschan fermamain, che la chogna è cupitgada giu dal terren taiss pervia da l'attatga e che quai è stada la raschun da sia mort. Blessuras che renviassan ad ina confruntaziun fisica cun ils lufs n'èn betg vegnidas constatadas.