Sonda, ils 29 d'october 2022, ha la surveglianza chantunala da chatscha stuì sajettar en la vischnanca da Lumnezia in luf mastgel creschì ch'era blessà grevamain. La surveglianza da chatscha ha fatg in'emprima examinaziun dal cadaver da l'animal ed ha chattà ina fractura da l'oss da la spatla. L'ulteriura analisa vegn fatga a l'Institut per medischina da peschs e selvaschina da l'Universitad da Berna tenor las prescripziuns dal Concept svizzer davart il luf. Questa analisa duai dar scleriment davart la dimensiun e davart ils motivs da la blessura. Da tge luf ch'i sa tracta ed a tge triep ch'el appartegna eventualmain, vegn analisà geneticamain dal Laboratori da biologia da conservaziun da l'Universitad da Losanna. En la regiun èn activs ils dus trieps dal Wannaspitz e da Valgronda.