Il 1. da december 2023 entra en vigur la revisiun parziala da l'Ordinaziun dal Cussegl federal davart la chatscha e la protecziun dals mamifers e dals utschels selvadis (OChP). Sin basa da quella ha il chantun Grischun inoltrà ils 7 da november 2023 a l'Uffizi federal d'ambient (UFAM) la dumonda definitiva per regular proactivamain la populaziun da lufs. Las resursas vegnan concentradas là, nua che la problematica sa preschenta actualmain il pli fitg.
La revisiun parziala da la OChP, ch'il Cussegl federal ha deliberà il 1. da november 2023, permetta da nov da regular proactivamain ils trieps da lufs durant l'atun e l'enviern sco er da regular vinavant en moda reactiva durant ils mais da stad ils trieps da lufs che fan donns. Sajettar entirs trieps da lufs è pussaivel sut la premissa, ch'ils trieps mussan in cumportament problematic areguard il stgarpar animals da niz u envers l'uman. Tut las dumondas da sajettar lufs ston vegnir permessas er vinavant da l'Uffizi federal d'ambient (UFAM).
Inoltrà la dumonda per la permissiun da sajettar ulteriurs 27 lufs
La finamira dal chantun Grischun èsi – sco emprim pass – da minimar en moda effizienta ils conflicts en territoris, nua ch'i dat difficultads cun lufs che mussan in cumportament problematic envers l'uman ed envers animals da niz. En quest connex dumonda il chantun la permissiun da sajettar tut ils lufs dals trieps da Stagias, Vorab, Beverin e Corn da Lantsch. En emprima lingia duain questas prelevaziuns avair l'intent d'impedir durant la proxima stagiun da pasculaziun las attatgas cumprovadas dals trieps da lufs da Stagias e Vorab sin arments sco er la superaziun repetida da mesiras per la protecziun da muntaneras tras ils trieps da lufs dal Beverin e dal Corn da Lantsch.
Plinavant ha il chantun er inoltrà la dumonda da sajettar fin dus terzs dals luffins dal triep da Rügiul en il Puschlav e dal triep dal Jatzhorn a Tavau. Ultra da la permissiun per 27 prelevaziuns, ch'el ha ussa dumandà, ha il chantun gia la permissiun tenor il dretg vegl da sajettar tut en tut 17 luffins dals trieps da Valgronda, Stagias, Vorab, Moesola e Corn da Lantsch.
Sustegn tras las chatschadras ed ils chatschaders
Dapi pliras emnas è l'Uffizi da chatscha e pestga fatschentà cun las preparativas, per che l'Ordinaziun da chatscha revedida possia vegnir realisada senza retard a partir dal 1. da december 2023. Las emprimas prelevaziuns tenor il dretg nov èn dentant pussaivlas mo fin ils 31 da schaner 2024. Per ch'ins sentia in effect gia durant la stagiun d'alp da la stad 2024, èn las autoritads executivas dumandadas fermamain. La protecziun da las muntaneras da muvel manidel resta vinavant in aspect central per pudair reducir ils donns.
Las autoritads vegnan a survegnir il sustegn da la chatscha speziala, quai sut la resalva che l'Uffizi federal d'ambient acceptia la dumonda da sajettar ils lufs e premess che la chatscha speziala en las regiuns respectivas na saja anc betg a fin. Il chantun è en contact cun l'Uniun grischuna da chatschadras e chatschaders da patenta. En il decurs dals proxims dis vegn el ad infurmar las chatschadras ed ils chatschaders en las regiuns pertutgadas davart il proceder.
Vinavant impurtant d'annunziar observaziuns
Ils trieps da lufs dovran da natira gronds territoris, quai cunzunt durant l'enviern. Annunzias da la populaziun dattan a la surveglianza chantunala da chatscha indizis impurtants davart il lieu da dimora dals lufs. L'Uffizi da chatscha e pestga supplitgescha perquai d'annunziar er vinavant immediatamain cumprovas da lufs a las surveglianzas da chatscha localas. Las indicaziuns da contact chattais Vus sin www.ajf.gr.ch > Sur da nus.