Per ils animals selvadis èn ils mais d'enviern ina gronda sfida. Pervia da las temperaturas bassas e perquai che la purschida da nutriment è stgarsa, ston ils animals selvadis en las muntognas spargnar energia. Sche las persunas che fan sport da naiv observan quatter simplas recumandaziuns da cumportament, chattan ils animals selvadis avunda paus en lur quartiers d'enviern per passentar bain l'enviern.

La campagna «Respecta tes cunfins – sport da naiv e respect» realisescha dapi blers onns en l'entira Svizra mesiras per sensibilisar las persunas che fan sport da naiv ordaifer las pistas. Per quest intent metta ella a disposiziun materialias stampadas ed online, sco per exempel placats, mappas da scolaziun u videoclips, che pon vegnir retratgas gratuitamain sut https://natur-freizeit.ch/bildungsangebot. Il proxim enviern vegnan plinavant extendidas las purschidas da furmaziun per las classas da scola en la Svizra tudestga. En cumbinaziun cun moduls d'emprender divertents en la stanza da scola e sin in'excursiun cun gianellas guidada, emprendan ils uffants ed ils giuvenils d'enconuscher ils animals selvadis e lur spazis da viver sco er dad ir enturn cun respect cun ils animals che vivan en la regiun.

Il chantun Grischun sustegna la campagna «Respecta tes cunfins – sport da naiv e respect». Sin wildruhezonen.ch vegnan plinavant communitgadas las zonas da paus per la selvaschina cun ils temps da schanetg e las vias da passadi, che las vischnancas han determinà. Per proteger ils animals selvadis cunter disturbis, restrenschan las zonas da paus per la selvaschina en tscherts lieus e durant tscherts temps l'access als quartiers d'enviern da la selvaschina.

Grazia a las zonas da paus per la selvaschina ch'èn sa cumprovadas e cun las campagnas currentas èsi pussaivel da sensibilisar la populaziun e las autoritads per la problematica dals disturbis e da proteger ils animals selvadis cunter disturbis excessivs.

Dapli infurmaziuns: https://natur-freizeit.ch, Zonas da paus per la selvaschina – spazi da viver