"grischunHIKE", il project chantunal da promoziun per il turissem da viandar, publitgescha ina concurrenza d'ideas. Dumandadas èn ideas da project exemplaricas per sendas da viandar captivantas ed innovativas, che permettan invistas surprendentas, spezialas, novas u er emblidadas.

La cuntrada natirala e cultivada multifara ed extraordinaria è il chapital turistic dal chantun Grischun. Sendas da viandar rendan accessiblas nossas cuntradas e permettan a las viandantas ed als viandants d'explorar e da traversar quests territoris. Ina senda da viandar orientada vers l'avegnir è ina via innovativa che maina scuvridras e scuvriders passiunads en lieus ed en cuntradas cultivadas, che pussibilitescha novas experientschas u che permetta in sguard en temps passads. Igl è ina via che preschenta connexs pli cumplexs cun agid d'infurmaziuns medialas sco booklets, flyers, tavlas u apps. Cun spassegiadas orientadas vers l'avegnir sa laschan scuvrir e vesair novas dimensiuns en il Grischun.

Concurrenza d'ideas dal post spezialisà per il traffic betg motorisà

Il post spezialisà per il traffic betg motorisà da l'uffizi da construcziun bassa dal Grischun tschertga propostas per talas sendas orientadas vers l'avegnir. En il rom dal project "grischunHIKE", che vul promover il turissem da viandar, publitgescha l'uffizi da construcziun bassa ina concurrenza d'ideas. Premiadas duain vegnir ideas per sendas da viandar en il Grischun che cuntegnan mesiras architectonicas, che s'integreschan en il maletg da la cuntrada e che sa fatschentan en moda particulara cun quest maletg. La concurrenza sa drizza a planisadras e planisaders ed a teams da planisaziun da l'entira Svizra.

Giudicament tras ina giuria spezialisada

Ina giuria spezialisada – che sa cumpona da represchentantas e represchentants dals secturs turissem, tecnica, protecziun da la natira e da la patria sco er da Sendas grischunas – vegn a giuditgar las inoltraziuns sut la direcziun da l'inschigner Jürg Conzett da Cuira. Da quest pool d'ideas vegn ella ad undrar trais fin tschintg projects. Ils premis vegnan surdads a chaschun da la dieta da GrischunMobil dals 28 da matg 2019 a Cuira.

Las vischnancas pertutgadas decidan, sch'ellas vulan realisar ina u pliras da las ideas da project inoltradas. La realisaziun dals projects victurs è medemamain chaussa da las vischnancas, sco quai ch'igl è previs en la lescha chantunala davart las vias. Il chantun po sustegnair finanzialmain las vischnancas che realiseschan tals projects.

Agiunta:

Program da concurrenza

Fotografias:

Descensiun da la chamona dal Piz Durschin vers Breil

Al pass da Schlingia, Scuol