Navigation

Inhaltsbereich

Cun la campagna "Fairtrail" fa il chantun Grischun dapi l'atun 2019 reclama per dapli toleranza tranter ciclistas/ciclists e viandantas/viandants sin las sendas grischunas e sin ils trails. Cun ina sauna purziun umor grischun vul la campagna da communicaziun sensibilisar sur plirs onns ils giasts ed indigens da prender resguard in da l'auter, ma er infurmar co ch'ins sa cumporta correctamain en la natira e tge ch'i dovra per esser bain preparà.

La campagna vegn realisada d'ina vart cun agid da broschuras che rendan attent a las relaziuns particularas en il Grischun e che preschentan las reglas da cumportament fundamentalas "gentil, net e pront!". Da l'autra vart repart'ins en il rom da la campagna als furniturs da prestaziuns turisticas meds da sensibilisaziun en furma da regalins da reclama sco tatgaders, plachettas e scalins da velo. Bandierettas d'avertiment vi da las saivs da pastgiras infurmeschan las utilisadras ed ils utilisaders co sa cumportar a moda correcta er en ils territoris d'alp e d'agricultura.

Fairtrail è dapli che mo ina campagna da communicaziun. Igl è ina tenuta vivida che ha pudì vegnir realisada grazia a la collavuraziun da blers onns tranter las pli differentas instituziuns chantunalas, da l'Uffizi da construcziun bassa fin a l'Uffizi d'economia dal Grischun, da Grischun Vacanzas fin a las destinaziuns turisticas, dal manader d'excursiuns fin al guid da bike.

Empustar ils products per in trail fair pudais Vus qua.

 

Flyer PDF (en tudestg)