La campagna «Co vai cun tai?» va en la proxima fasa. En il center stattan 6 impuls per rinforzar la sanadad psichica. La sanadad psichica pertutga nus tuts: Mintga segunda persuna patescha ina giada d'ina malsogna psichica; tuts han mintgatant ina grevezza psichica. Igl è impurtant da rinforzar la psica e d'identifitgar a temp problems – per la persuna sezza, per la societad e per l'economia. La campagna «Co vai cun tai?» presta ina contribuziun en chaussa.

Etablida en tut ils chantuns da la Svizra tudestga

Dapi intgins onns realiseschan ils chantuns da la Svizra tudestga e la fundaziun Pro Mente Sana la campagna per incumbensa da Promoziun Sanadad Svizra. Perquai na chatt'ins ella betg mo sin placats ed online, mabain er en scolas, en manaschis, en centers da giuvenils, en clinicas, en chasas communalas ed en blers auters lieus.

Focus sin rinforzar las resursas

La gronda part da la populaziun en Svizra è conscienta dal fatg, ch'igl è impurtant da tgirar l'atgna sanadad psichica. Quai è vegnì mussà l'onn 2023 en il studi «MoRePsy» (Monitoring Resursas Sanadad psichica). Mo la mesadad da la populaziun sa dentant, tge ch'ins po far concretamain per rinforzar la psica, e prenda conscientamain mesiras correspundentas. «Ils resultats suttastritgan, quant central ch'igl è d'intermediar strategias per rinforzar las atgnas resursas e l'ambient social» accentuescha prof. dr. Thomas Mattig, il directur da Promoziun Sanadad Svizra.

6 impuls efficazis

Fin ussa era la finamira da la campagna quella, da sensibilisar la glieud da percepir ils agens sentiments e da «discurrer surlonder». Da nov vegni focussà sin 6 impuls che rinforzan cumprovadamain la psica. Numnadamain: tgirar relaziuns, scuvrir insatge nov, resguardar il stil da viver, identifitgar l'atgna valur, tschertgar il discurs ed acceptar sustegn. Cler èsi: I dat bleras pussaivladads da rinforzar la sanadad psichica. Betg mintga pussaivladad è adattada per tuts – ma mintga persuna po chattar insatge che fa bain ad ella. Sin la pagina d'internet www.wie-gehts-dir.ch, en l'app da la campagna ed en las medias socialas vegnan preschentads blers exempels concrets per realisar ils impuls.

Realisaziun che sveglia l'attenziun

Per intermediar ils impuls intuitivs e simpels da chapir en ina moda che sveglia l'attenziun, sa serva la campagna d'exempels umoristics per realisar ils impuls. Uschia vul la campagna intimar da s'occupar dal tema – ed a medem temp mussar, ch'ins po survegnir dapli gust da viver, plaschair ed energia, sch'ins rinforza la sanadad psichica.

Il Post spezialisà per la promoziun da la sanadad sustegna la campagna «Co vai cun tai?» e s'engascha uschia per la sanadad psichica en il Grischun.

Ulteriuras infurmaziuns: wie-gehts-dir.ch