Ils cafés narrativs porschan in access simpel al barat e promovan las cumpetenzas da vita da las participantas e dals participants. Els stgaffeschan in spazi, nua che persunas da tut las generaziuns e da tut las derivanzas pon parter lur istorgias, tadlar ed emprender ina da l'autra. Tras quests inscunters na resulta betg mo in enritgiment persunal, mabain er ina convivenza viva en la vischnanca.

Ils 16 da settember 2025 han 16 participantas e participants engaschads en il Rigahaus Cuira frequentà il curs d'introducziun per organisar e per moderar cafés narrativs. En il curs èn vegnidas intermediadas enconuschientschas fundamentalas: Tge caracterisescha in café narrativ? Co vegn el preparà e manà en moda professiunala? E co reusseschi da crear in'atmosfera averta e da stima, nua che tuttas e tuts sa sentan bain?

Pervia dal grond interess vegnan purschids ulteriurs curs d'introducziun:

• ils 23 d'october 2025 a Cuira
• ils 3 d'october 2025 a Grono (en talian)
• ils 18 da november 2025 online (en talian)

L'approfundaziun qua sutvart ha lieu a Cuira en il rom dal curs da scolaziun da 3 dis, ils 4/5 da favrer ed ils 8 da zercladur 2026.

Ils curs vegnan realisads da la Rait Café narrativ ed organisads en cooperaziun cun il Post spezialisà per la promoziun da la sanadad, cun la Baselgia evangelica refurmada dal Grischun e cun benevol Grischun. Ensemen ans engaschain nus, per che cafés narrativs sa sviluppian en tut il chantun ed hajan in effect persistent – sco lieus per sa scuntrar e per rinforzar la coesiun sociala.

Ulteriuras infurmaziuns chattais Vus sut: Café narrativ