Ils bancs da lain mellens traglischants da la campagna naziunala «Co vai cun tai?» èn in segn visibel per la sanadad psichica en il spazi public. Els envidan da star, da s'inscuntrar e da discurrer e promovan tant il moviment sco er pausas recreativas. En differentas vischnancas grischunas datti gia tut en tut 94 bancs «Co vai cun tai?».

Il Post spezialisà per la promoziun da la sanadad sa participescha danovamain a la campagna naziunala e lantscha per l'emprima giada in'acziun da banchins per scolas (durada 2026-2028). Tut en tut 8 bancs cun pusals vegnan surdads gratuitamain a las scolas interessadas.

Finamira da l'acziun

Cun l'acziun vul il Post spezialisà per la promoziun da la sanadad sustegnair las scolas da tematisar la sanadad psichica en il mintgadi. Tgi ch'emprenda baud da percepir sentiments e da discurrer dad els, rinforza l'atgna sanadad psichica e la convivenza en il mintgadi da scola. Impurtantas persunas da referiment èn – ultra dals geniturs e dals peers – er las persunas d'instrucziun e las lavureras socialas da scola sco er las direcziuns da scola. Cun porscher temp per discurs, cun demussar vair interess per il bainesser e cun esser avert per ils giavischs dals uffants e giuvenils sa sviluppan relaziuns fidadas. Ellas èn ina pitga indispensabla en situaziuns engrevgiantas. Il banchin po esser tant in lieu plain vita per s'inscuntrar sco er in lieu da quietezza per discurs.

Cundiziuns da participaziun per scolas

Lieu

• La scola fixescha in lieu adattà e generalmain enconuschent.
• Il banchin duai esser accessibel per tut las scolaras ed ils scolars.

«Squadra dal banchin» e «madritscha / padrin dal banchin»

• La scola tscherna ina classa u ina gruppa da scolaras e scolars, che gida sco «squadra dal banchin» a realisar l'acziun al lieu.
• Ultra da quai vegn designada ina madritscha respectivamain designà in padrin dal banchin. Quai po esser la magistra u il magister da classa, la lavurera sociala da scola u in'autra persuna creschida d'assistenza.

Incumbensas da la madritscha u dal padrin dal banchin

• Persuna da contact per il Post spezialisà per la promoziun da la sanadad
• Sa participar a l'occurrenza online dals 14 da schaner 2027, da las 12.30 fin las 13.15
• Coordinar e publitgar material da campagna adattà entaifer la scola
• Sa participar al webinari tematic davart la sanadad psichica la stad 2027 ed al barat d'experientschas final online la stad / l'atun 2028

Sustegn tras il Post spezialisà per la promoziun da la sanadad

• Cussegliaziun e sustegn tar dumondas e giavischs
• Spediziun dal material d'infurmaziun da la campagna «Co vai cun tai?»
• Elements da text per la lavur da medias e da publicitad
• Purschida da furmaziuns supplementaras a la Scola auta da pedagogia dal Grischun l'onn 2027
• Webinari davart la sanadad psichica la stad 2027
• Newsletter cun novs impuls e recumandaziuns cumprovadas

Procedura d'annunzia ed attribuziun

• Scolas interessadas s'annunzian sur il suandant link: https://findmind.ch/c/UvuR-9vGm
• Ultim termin d'annunzia: glindesdi, ils 26 d'october 2026
• Ils banchins vegnan attribuids cun trair la sort.
• Las scolas tschernidas vegnan publitgadas fin ils 2 da november 2026
• Ils bancs vegnan furnids gratuitamain il november 2026.

L'entira acziun dura fin la fin da l'onn da scola 2027/28. Suenter la scadenza da quest termin vegnan abolidas las obligaziuns envers il Post spezialisà per la promoziun da la sanadad e la scola po duvrar il banchin libramain, per exempel sco insla d'emprender, sco banchin da leger u da moviment u sco lieu da repaus.

Nus ans legrain da Vossa annunzia!

Contact

En cas da dumondas contactai il Post spezialisà per la promoziun da la sanadad:
Sabrina Zimmermann, manadra da project Promoziun da la sanadad
081 257 64 08, Sabrina.Zimmermann@san.gr.ch