Elavuraziun da las cundiziuns generalas politicas
Mintga vischnanca ha ina influenza decisiva sin las cundiziuns da crescher si e da viver da sia populaziun. Ina vischnanca po metter ils accents uschia, che uffants pitschens, uffants e giuvenils cun lur persunas da referiment sco er persunas pli veglias cun lur confamigliars prendan en lur mintgadi decisiuns che promovan la sanadad, creschan si saunamain e pon viver uschè ditg sco pussaivel en moda autodeterminada.
Cun sviluppar in concept communal per la politica d'uffants e da giuvenils cun il focus sin la promoziun da la sanadad surpiglia la vischnanca sia responsabladad da mantegnair resp. da stgaffir cundiziuns da viver positivas ed utilas.
Il svilup d'in concept ha lieu en quatter fasas e po vegnir realisà en ina vischnanca, en ina corporaziun da vischnancas u en ina regiun:
- Preparaziun
- Analisa da la situaziun
- Svilup dal concept e realisaziun da las emprimas ideas dal project
- Realisaziun ed evaluaziun dal concept
Gruppa/s en mira
Uffants, giuvenils, giuvens creschids e lur persunas da referiment (0 – 20 onns), Persunas responsablas da la politica ed emploiadas ed emploiads da l'administraziun sin plaun communal / regiunal, Persunas spezialisadas ed acturs dal sectur uffants e giuvenils
En cas da basegn po il svilup dal concept vegnir extendì sin autras gruppas en mira.
Finamiras dal project
Cun sviluppar il concept vegnan resguardadas las circumstanzas specificas da la vischnanca. Las gruppas en mira vegnan integradas activamain ed i vegn sa basà sin mesiras gia existentas.
Il focus è sin la promoziun da:
- infurmaziuns simplas
- purschidas che correspundan a la dumonda ed al basegn
- cundiziuns da viver che promovan la sanadad
- participaziun a la vita sociala ed engaschi voluntar
- raits e cooperaziun
- direcziun e realisaziun a lunga vista
Cuntegns da la purschida
- Cussegliaziun davart la promoziun da la sanadad e sustegn cun argumentaris per tut las gruppas en mira
- Surpigliada dals custs per l'accumpagnament extern dal project che sustegna il svilup dal concept en la vischnanca
- Sustegn finanzial da 50 %, max. 10 000 francs per sviluppar il concept
Cundiziuns generalas
- Decisiun da princip da la politica communala cun suttascriver ina cunvegna
- La vischnanca garantescha ina direcziun dal project adattada cun ina dimensiun da ca. 10 – 20 pertschients d'ina plazza per ina perioda dad 1,5 – 2,5 onns
- Commembra u commember da la suprastanza communala (p.ex. l'incumbensada u l'incumbensà per la promoziun da la sanadad e per la prevenziun) represchenta la vischnanca en la gruppa directiva
- Approvaziun dal concept tras la vischnanca e surdada da l'incumbensa da realisaziun (incl. finanziaziun)
Links