Rinforzar la protecziun da la giuventetgna (prevenziun da dependenzas) - basas, cumpras da test e scolaziuns
Ils giuvenils reageschan pli fitg che persunas creschidas sin l'alcohol, sin ils products da tubac e sin ils products da nicotin. Il consum regular sco er excessiv mida il tscharvè giuvenil en moda duraivla e negativa. Per ina persuna che consumescha gia baud, è il privel er pli grond ch'ella daventia dependenta. Giuvenils han mirveglias, ristgan dapli ed han damain experientschas che creschids. Per sustegnair in svilup uschè saun sco pussaivel datti leschas davart la protecziun da la giuventetgna. Vender e dar vinavant alcohol e products da tubac a giuvenils è reglà suandantamain:
- nagin alcohol e nagins products da tubac a giuvenils sut 16 onns
- naginas spirituosas, aperitivs ed alcopops a giuvenils sut 18 onn
A vischnancas, ad organisaturs ed a posts da vendita porscha il Post spezialisà per la promoziun da la sanadad sustegn e cussegliaziun en connex cun l'observaziun da las disposiziuns legalas davart la protecziun da la giuventetgna.
Material per la protecziun da la giuventetgna
Il material gratuit da «Check protecziun da la giuventetgna» gida ils organisaturs ed ils posts da vendita ad observar las disposiziuns legalas al lieu.
Il suandant material po vegnir empustà gratuitamain tar il Post spezialisà per la promoziun da la sanadad.
- Tavlas d’indicaziuns (oransch u mint)
- Tatgaders (oransch u mint)
- Bratschlets da controlla da vegliadetgna (>16onns/16-18 onns <18 onns)
Links
Cumpras da test dad alcohol e tubac
Las cumpras da test en il chantun Grischun vegnan actualmain regladas da nov. En cas da dumondas As drizzai a Kevin Meier, Coordinatur Prevenziun da dependenza, kevin.meier@san.gr.ch.
Scolaziuns per la protecziun da la giuventetgna
Il Post spezialisà per la promoziun da la sanadad porscha a las vischnancas ed als organisaturs scolaziuns gratuitas per il persunal da vendita e da service. La scolaziun intermediescha fatgs davart il consum d'alcohol e da tubac da giuvenils, davart disposiziuns legalas e davart exempels d'agir concrets en connex cun la vendita da las substanzas. En cas d'interess As drizzai a Kevin Meier, Coordinatur Prevenziun da dependenza, kevin.meier@san.gr.ch.
age-check.ch – curs online
Il curs intermediescha en furma concisa e cumpacta las infurmaziuns las pli impurtantas davart la vendita d'alcohol per il persunal da vendita e da service. Durada 20 – 30 minutas.
Links
App per scannar la ID
L'app legia il document d'identitad e mussa la vegliadetgna da la persuna. In sistem d'ampla inditgescha, tge products che dastgan vegnir vendids. I vegn distinguì tranter sut 16 onns, 16 fin 18 onns e sur 18 onns.
L'app funcziuna senza colliaziun cun l'internet e garantescha la protecziun da datas. I na vegnan arcunadas u transmessas naginas datas.
Links