Il fanadur ha il team dal post spezialisà Prevenziun cooperà al program da curs per las collavuraturas ed ils collavuraturs da la fundaziun ARGO. Durant in'emna è il cumportament correct en il traffic sin via vegnì instruì a las collavuraturas ed als collavuraturs dals lavuratoris da la ARGO a Cuira, Tavau, Glion e Casti.
Polizists da tutgar en
Las collavuraturas ed ils collavuraturs da la ARGO han pudì frequentar ils curs «La lavur en la lavandaria», «Dies saun», «Separaziun dals ruments en il lavuratori», «Pestgar» e «Segirezza en il traffic sin via». En il curs da la Polizia chantunala dal Grischun han las participantas ed ils participants emprendì, l'emprim en la stanza da sesidas, tge ch'ils signals da traffic signifitgan. Lura han ellas ed els exercità sin il passape ed a las strivlas melnas en il liber. Per las persunas cun in impediment èsi stà in punct culminant, d'avair polizists uschè datiers dad ellas d'als pudair tutgar en e d'emprender dad els il cumportament correct en il traffic sin via.
«Vegnis vus l'onn proxim puspè?»
Il team dal post spezialisà Prevenziun guarda enavos sin in'emna da success. Als polizists han ils egls glischents e ventiraivels sco er il plaschair d'emprender da las participantas e dals participants plaschì il meglier. «A la fin dal curs han ellas ed els dumandà nus pliras giadas, sche nus vegnian l'onn proxim puspè. Nus avain er gia ina idea per l'onn 2023, numnadamain d'agiuntar in ulteriur bloc da scolaziun 'Ir enturn cun las medias digitalas'», tradeschan ils polizists.
