Dals 12 fin ils 16 da november è la Polizia chantunala dal Grischun sa preschentada – ensemen cun la Polizia da la citad da Cuira – a l'exposiziun professiunala grischuna Fiutscher. Passa 17 000 visitadras e visitaders han visità la Halla da la citad da Cuira, tranter quels bunamain 4000 scolaras e scolars durant ils emprims trais dis. Zunt legraivel è stà il fatg, che pli e pli bleras persunas creschidas vulevan savair, tge che stat davos l'unifurma.

Noss stan è stà in vair magnet dal public. Grazia a la nova roda da lottaria han ins pudì experimentar la lavur da la polizia en moda ludica. Tut tenor il simbol han las visitadras ed ils visitaders dastgà avrir chanvettas, barattar messadis radiofonics u palpar objects misterius per segirar indizis. Las mirveglias èn uschia sa midadas svelt en entusiassem ed ina visita da la fiera en ina pitschna excursiun en il mintgadi da la polizia.
Ils blers resuns positivs han mussà, che la Polizia chantunala dal Grischun vegn percepida sco patruna moderna ed averta. La Fiutscher è stada per nus in'occasiun ideala per preschentar en moda autentica noss champ professiunal multifar e per dar a las visitadras ed als visitaders ina invista viva da noss mintgadi.