La fin da mars ha la Polizia chantunala dal Grischun preschentà a duas conferenzas da medias la Statistica criminala da la polizia e la Statistica dals accidents da traffic da l'onn 2022. Mintgamai var ina dunsaina collavuraturas e collavuraturs da las medias han dà suatientscha a l'invit. Quest onn han referì ultra dals manaders da partiziun ulteriurs spezialists davart lur champs da cumpetenza.
Barbara Hubschmid, scheffa da la Polizia criminala, preschenta las cifras da l'onn 2022 ensemen cun la collavuratura dal cader da la Polizia criminala e cun la manadra da l'Uffizi dal servetsch social. Silsuenter dattan las referentas ed ils referents a las collavuraturas ed als collavuraturs da las medias intervistas individualas per il radio e per la televisiun.
«Tut en tut èn vegnids commess 23 % dapli delicts che l'onn precedent», explitgescha la scheffa da la Polizia criminala. Il dumber da delicts da facultad è schizunt s'augmentà per 29 %. Barbara Hubschmid accentuescha en quest lieu la buna lavur da las investigaturas e dals investigaturs, perquai che las quotas da scleriment tar ils delicts da facultad han pudì vegnir augmentadas da 34 % sin passa 40 %, tar ils enguladitschs cun infracziun da 38 % sin 52 % e tar las cuntravenziuns cunter il Cudesch penal schizunt da 49 % sin 54 %.
Christoph Scherer, schef dal Servetsch da cybercriminalitad, relativescha la diminuziun dals cyberdelicts per 9 %, las cifras en la perioda da rapport actuala vegnan cumparegliadas cun in onn 2021 extraordinari ch'è stà tranter auter sur la media cun in augment dals dumbers da cas da 68 % pervia da las mesiras da corona.
«En spezial a Cuira èn s'augmentads fermamain enguladitschs – er pervia da las substanzas da drogas che sa midan resp. pervia dal cumportament da dependenza en la scena», declera Andreas Werth, schef da l'Investigaziun Cuira.
Aluis Candinas, schef da la Polizia da traffic da la Polizia chantunala dal Grischun, preschenta la Statistica d'accidents 2022. Sin las vias dal Grischun n'hai betg dà dapli accidents che l'onn precedent, in'excepziun èn ils accidents da moto. Silsuenter mussa Silvio Tscharner da l'Uffizi da construcziun bassa dal Grischun a maun d'exempels concrets, tge mesiras d'infrastructura ch'èn vegnidas realisadas ils ultims onns grazia a las cifras da la statistica.
En l'intervista declera il schef da la Polizia da traffic la nova campagna da placats: «Nus vulain sensibilisar las motociclistas ed ils motociclists d'esser attents en il traffic e d'adattar il tempo.»
Suenter la conferenza da medias nizzegian las collavuraturas ed ils collavuraturs da las medias la chaschun per far registraziuns filmicas cun ina patruglia da traffic tar il commando da polizia.
Er la realisaziun d'in test d'alcohol vegn registrada, perquai che las cifras dals accidents da manischar sut l'influenza d'alcohol èn creschidas da 93 l'onn 2021 sin 118 l'onn 2022.
Link a las statisticas
Link a la communicaziun a las medias statistica criminala da la polizia
Link a la communicaziun a las medias statistica dals accidents da traffic