In novum en la furmaziun supplementara dal corp da polizia
La furmaziun supplementara poliziala interna, cun prioritad en il sectur da la polizia da segirezza, è vegnida concepida cumplettamain da nov l'onn passà. Ella è vegnida cumplettada cun scolaziuns spezialas e praticas e cumbinada cun ina reserva d'acziun operativa. Betg mo la qualitad da la furmaziun supplementara è vegnida augmentada uschia – ina gronda plivalur è er la reserva d'acziun operativa che stat a disposiziun durant 24 uras per acziuns da la front spontanas e planisablas. Mintga onn fixeschan las manadras ed ils manaders da la partiziun temas actuals e puncts centrals da la furmaziun supplementara.
Teams maschadads
Da nov ha lieu la furmaziun supplementara en pitschnas gruppas d'otg participantas e participants. Quels derivan da differentas partiziuns e regiuns. Communablamain percurran els il program d'ina emna. Uschia fan ins servetsch ensemen cun collegas ch'ins ha avant strusch enconuschì. Quai vegn valità sco fitg positiv. Ins emprenda in da l'auter e survegn invista dal mintgadi da lavur d'ina autra partiziun u d'ina autra regiun. Quai promova la coesiun ed il spiert da corp.
In spezialist dal servetsch cunter la cybercriminalitad declera, co ch'ins po percorscher spoofing
Servetsch da segirezza a la sessiun dal Cussegl grond
Il dispositiv da segirezza a la sessiun dal Cussegl grond vegn da nov realisà tras la reserva d'acziun messa a disposiziun. La polizia garantescha la segirezza da la Regenza e da las parlamentarias ed ils parlamentaris, procura per in decurs senza disturbis da la sessiun e realisescha proporziunalmain las mesiras da segirezza. Las politicras ed ils politichers apprezieschan la preschientscha da las polizistas e dals polizists.
La sessiun d'avrigl ha gì lieu en il center da congress a Tavau. Entamez il cusseglier guvernativ Peter Peyer
Per in'auta segirezza da culp
Igl è per tut las commembras ed ils commembers dal corp obligatoric da tegnair aut la segirezza da culp cun la pistola e cun la pistola-mitraglia e da passar il test da tir annual Ostpol. En la furmaziun supplementara da la polizia da segirezza repetan ellas ed els las manipulaziuns correctas vi da l'arma sco er las disposiziuns da segirezza e d'exercizi.
I vegn spezialmain trenà da trair tar nauschas relaziuns da glisch
Tar las furmaziuns supplementaras da la polizia da segirezza tutga vinavant l'utilisaziun d'in bastun d'acziun guliv. Cun in augment d'ina attatga vegn er la defensiun da polizia augmentada.
Las participantas ed ils participants exerciteschan differentas posiziuns e tecnicas da la defensiun
"Jau rest anc in'emna pli ditg"
Suenter mintga emna da furmaziun supplementara e d'engaschament han las participantas ed ils participants pudì appurtar resuns e propostas da meglieraziun. Bler è vegnì realisà immediatamain: dal deposit da material fix, a l'urari, fin a la regulaziun da las pernottaziuns. Che las instructuras ed ils instructurs han temp en las gruppas pitschnas da tegnair quint da tuttas e tuts separadamain, è vegnì considerà sco grond avantatg. Il pli bel cumpliment a las persunas responsablas da furmaziun supplementara è dentant stà il resun d'in schef d'ina basa: «Jau rest anc in'emna pli ditg.»