Sonda, ils 17 da settember 2022, ha gì lieu il quart ed ultim test da qualificaziun da quest onn. En il Meiersboden a Cuira ha il team Resursas umanas pudì beneventar cun plaschair participantas e participants da tut il chantun, gea schizunt da l'entira Svizra Orientala.

Tenor il proverbi enconuschent tudestg «Morgenstund hat Gold im Mund» ha l'emprima gruppa cumenzà gia a las 07.00 cun il test da grammatica, suandà d'in test da savida che ha durà maximalmain 1 ura e 40 minutas. En il test da savida èn vegnidas eruidas e valitadas las enconuschientschas da las candidatas e dals candidats, quai a maun da cumplettaziuns da frasas, analogia, concordanzas, serias da dumbers, exercizis cun dats e.u.v.

Suenter hai gia dà in'emprima runda per stgaudar la detta cun il test da scriver sin tastatura. Il test da grammatica e da scriver sin tastatura vegn fatg per eruir il stadi d'enconuschientschas e na vegn betg resguardà en la valitaziun dal test da qualificaziun. 

Suenter che tut las participantas ed ils participants han gì absolvì ils emprims tests, han ellas ed els cuntinuà cun il test da sport. La finamira era qua d'absolver uschè bleras rundas sco pussaivel dal percurs da sport. Las participantas ed ils participants ch'èn arrivads a lur cunfins cun absolver il percurs, èn vegnids animads da las candidatas e dals candidats che spetgavan, uschia ch'ellas ed els èn vegnids purtads tras las rundas. 

Suenter il test da sport èn tuts turnads en il Meiersboden. En in curt discurs han las participantas ed ils participants survegnì directamain il resultat sco er il certificat cun las parts reussidas / betg reussidas da l'examen. 

La finala po la Polizia chantunala dal Grischun guardar enavos sin quatter tests da qualificaziun realisads cun success quest onn. Tut las absolventas ed ils absolvents, che han terminà cun success tuttas duas parts da l'examen, pon ussa s'annunziar sco futuras aspirantas e futurs aspirants da polizia a la Scola da polizia da la Svizra Orientala u dal Tessin.