Gist duas giadas ha la Polizia chantunala dal Grischun pudì festivar il settember cun sias futuras polizistas e cun ses futurs polizists. 14 aspirantas ed aspirants da polizia han reussì l'examen davart la capacitad d'intervenziun a la fin da lur emprim onn d'instrucziun. Otg polizistas giuvnas e polizists giuvens èn vegnids saramentads uffizialmain suenter lur segund onn d'instrucziun ed èn ussa superbis d'appartegnair al corp da polizia.
Ins ha directamain udì a crudar in crappun, cura ch'ils resultats dals examens èn vegnids communitgads – tge plaschair! Las aspirantas ed ils aspirants da polizia cun fatschas ventiraivlas a la fin da l'emprim onn d'instrucziun. Ellas ed els tuts han reussì l'examen davart la capacitad d'intervenziun (ECI) (in'aspiranta schizunt cun nota excellenta). Suenter la gronda festa da diplom da la Scola da polizia ad Amriswil è suandada directamain la presaramentaziun tras il cumandant Walter Schlegel. L'onn pratic po cumenzar.
Cun dar il maun sur la bandiera dal corp han las otg novas commembras e novs commembers dal corp dà lur empermischun d'uffizi al cumandant Walter Schlegel en l'auditori da la BCG a Cuira. Duas persunas han fatg l'examen professiunal federal il favrer a la Scola da polizia a Giubiasco, sis il settember a la Scola da polizia ad Amriswil. La scola da polizia 2020–2022 è l'emprima che ha durà 2 onns tenor il concept general da la politica da furmaziun.