Curs da basa da notg per ils maina-acziun sgulants (2022)
Dals 14 fin ils 18 da november 2022 ha gì lieu a Cuira il curs da basa da notg per ils maina-acziun sgulants da differents corps da polizia da la Svizra. Da l'organisaziun sco er da la realisaziun da questa scolaziun per incumbensa da l'Institut svizzer da polizia (ISP) è s'occupada la Polizia chantunala dal Grischun.
Durant in'emna èn vegnids scolads a Cuira maina-acziun sgulants da l'entira Svizra per operaziuns da polizia durant la notg ord il helicopter. Ils 8 polizists han emprendì d'ir enturn da notg cun il helicopter sco er da duvrar differents meds auxiliars tecnics, sco per exempel cameras termicas. Ils helicopters dal tip EC 635 sco er lur pilots ha l'Aviatica militara da l'Armada svizra mess a disposiziun.
In instructur da la Polizia chantunala dal Grischun declera ad in team l'exercizi cun ina camera termica da maun
Incumbensas dals maina-acziun sgulants
Ils maina-acziun sgulants (MAS) lavuran cun il helicopter sco med d'acziun polizial ed èn scolads spezialmain per s'orientar en la cuntrada, per observar, per explotar e per far scleriments or da l'aria. Cun l'helicopter pon ils MAS sustegnair acziuns da la Polizia da traffic, da la Polizia criminala e da la Polizia da segirezza. Ils MAS dirigian las forzas terrestras or da l'aria e mussan la via ad ellas.
Exercizi pratic «Eruir la temperatura cun la camera termica da maun»
Exercizi pratic cun l'apparat d'observaziun a radis infracotschens sco er cun la camera termica da maun
Ils helicopters da l'Aviatica militara èn pronts per l'acziun da notg
Fotografia da notg da la citad da Cuira