L'atun 2022 ha la Polizia chantunala dal Grischun fatg pass decisivs per optimar sia recrutaziun da persunal e ses marketing da persunal. La finamira principala da quest project cun caracter da mussavia è quella, d'augmentar l'attractivitad da la Polizia chantunala sco patruna e da permetter a candidatas e candidats potenzials invistas da las diversas fassettas dal mintgadi da lavur.
Il november 2022 ha la manadra da la partiziun HRM, Martina Riedi, lantschà il project Recrutaziun e marketing da persunal ed ha integrà quel tematicamain en la Strategia HRM 2023–2033 ch'è vegnida elavurada da nov. Ella ha accentuà la schanza unica da concepir la Polizia chantunala dal Grischun cuminaivlamain sco patruna attractiva cun ina cultura da direcziun e d'interpresa correspundenta. Suenter ina fasa d'elavuraziun intensiva ha il team da project interdisciplinar che stat sut l'egida dad Anita Hänni, manadra dal team HR, pudì proponer mesiras innovativas a la direcziun da la polizia. Resguardads n'èn betg mo vegnids ils basegns da las differentas generaziuns, mabain er las experientschas preziusas da las collavuraturas e dals collavuraturs actuals.
Las mesiras proponidas che han chattà in resun positiv entaifer la Polizia chantunala, cumpiglian vastas iniziativas en ils secturs da la recrutaziun e dal marketing da persunal. Ellas cuntegnan l'elavuraziun d'ina nova pagina d'internet, l'introducziun da plattafurmas da social media sco Instagram, Tik Tok, Youtube e LikedIn, la concepziun da material da reclama en in design unitar (corporate design), l'implementaziun d'in management da sanadad entaifer il manaschi en cooperaziun cun l'Uffizi da persunal sco er l'examinaziun da pussaivels models da lavur e l'optimaziun dals plans da servetsch.
Accentuada sto vegnir en spezial l'introducziun previsa d'ina frestga campagna da reclama per la Polizia chantunala dal Grischun, che illustrescha la diversitad da las differentas activitads entaifer la polizia. Ils emprims pass per realisar questa campagna èn planisads per l'atun/enviern 2023. La Polizia chantunala ha gia cumenzà a publitgar regularmain contribuziuns sin las plattafurmas da social media.
Tut las persunas interessadas èn envidadas cordialmain da persequitar il svilup captivant da la campagna da la Polizia chantunala dal Grischun. Quai pon ins far cun visitar la pagina d'internet, cun star attent proximamain a la nova preschentaziun da reclama sco er cun abunar ils chanals da social media. La Polizia chantunala dal Grischun sa legra d'ina interacziun directa e d'in barat cun la publicitad.