Cun la scolaziun da segirezza metta la Polizia chantunala dal Grischun in ferm signal per ina furmaziun supplementara cuntinuanta e pratica per sias collavuraturas e ses collavuraturs. Il focus vegn mess sin duas pitgas centralas: segirezza persunala e provediment sanitar. La finamira da la scolaziun da segirezza è da rinforzar la prontezza a l'acziun en il servetsch extern e da dar a las collavuraturas ed als collavuraturs ils instruments necessaris per pudair reagir en situaziuns difficilas en moda segira, decidida e cumpetenta.

Annual. Unifurm. Effizient.

La scolaziun da segirezza è ina furmaziun supplementara che ha lieu periodicamain ed è in punct fix en la planisaziun da l'onn. Tut las collavuraturas e tut ils collavuraturs dal servetsch extern sa participeschan duas giadas per onn a questa scolaziun. Questa regularitad na garantescha betg mo che las basas da la polizia vegnan consolidadas constantamain, mabain er che novs meds d'acziun e novas tacticas vegnan introducids e trenads effizientamain.

Cuntegns multifars – instruids sin basa pratica

La scolaziun da segirezza cumbinescha teoria cun trenament pratic sistematic. En l'emprima part da la scolaziun èn ils suandants puncts centrals sin il program:

·       tir polizial sut cundiziuns realisticas

·       cumportament tactic durant las acziuns

·       segirezza persunala en il mintgadi e sut stress

·       emprim agid e mesiras immediatas da salvament

In'attenziun speziala vegn dada a l'emprim agid. En collavuraziun cun las uniuns samaritanas vegnan trenadas mesiras vitalas – inclusiv tecnicas da reanimaziun per creschids ed uffants. Uschia èn las collavuraturas ed ils collavuraturs capabels da reagir svelt en cas urgents e da prestar agid cumpetent, fin che las persunas spezialisadas arrivan.

Ina gronda plivalur per il mintgadi da la polizia

Grazia a la scolaziun da segirezza survegnan tut las collavuraturas e tut ils collavuraturs dal servetsch extern ina scolaziun standardisada e coordinada che rinforza las cumpetenzas polizialas sco er sanitaras. Ils cuntegns èn accordads directamain cun la vita professiunala – cun la finamira d'augmentar la segirezza d'agir en situaziuns d'urgenza.

Scolaziun da segirezza – per dapli segirezza, dapli cumpetenza e dapli fidanza durant las acziuns.