Co percorschan ins manzegnas? Co daventa in suspect in med da cumprova d'accusaziun? E tge rolla gioga la psicologia en l'interrogaziun da perditgas? Cun questas dumondas èn s'occupads las participantas ed ils participants dal curs «Tecnica e psicologia d'interrogaziun» che fa part dal program da basa da la furmaziun supplementara.
La savida fundada inscuntra l'applicaziun pratica
Cumenzà ha la furmaziun supplementara cun in e-learning davart la psicologia d'interrogaziun e da deposiziun ch'è vegnì fatg individualmain a la plazza da lavur. Durant var quatter uras han las participantas ed ils participants acquistà basas teoreticas – da grevezzas cognitivas durant la deposiziun fin ad indicaturs d'engion tipics. Questa savida è stada la premissa per la participaziun al lavuratori ed ha furmà la basa per in barat professiunal cuminaivel.
Dis da lavuratori intensivs
Suenter in curt bainvegni ed ina introducziun en il cuntegn han gì lieu lavuratoris orientads a la pratica davart indizis e cumprovas sco er davart l'utilisaziun strategica da meds da cumprova. Cun exempels realistics concrets han las participantas ed ils participants analisà differents scenaris d'interrogaziun e reflectà lur agen proceder, adina sut il punct da vista: Co pon ins eruir cun meds psicologics la vardad?
Il segund di ha cumenzà cun in sguard sin las basas giuridicas da l'interrogaziun da perditgas, suandà d'ina confruntaziun intensiva cun la perscrutaziun da manzegnas. En vivas lavurs da gruppas e gieus da rolla han las participantas ed ils participants exercità il diever cun persunas inculpadas, perditgas e persunas che dattan infurmaziuns. A la fin hai dà in «exercizi final», nua che tuttas e tuts han pudì cumprovar l'emprendì.
Dapli che mo teoria – dretgas cumpetenzas per il mintgadi da polizia
Il spezial da questa furmaziun supplementara è stà il stretg entretschament da teoria, pratica e reflexiun. Las participantas ed ils participants n'èn betg mo turnads a chasa cun novs impuls professiunals, mabain er cun ina meglra vista per dinamicas interumanas, per tentativas d'engion e per l'effect da las atgnas tecnicas d'interrogaziun.
Saja quai tar l'interrogaziun d'ina persuna suspectada u tar la documentaziun giuridicamain segira da testimonianzas – ils cuntegns instruids en la furmaziun supplementara contribueschan directamain a la qualitad da la lavur da polizia, quai ch'è en accordanza cun las finamiras da la strategia HRM 2023–2033.