Questa primavaira ha il Servetsch da giuvenils festivà ses giubileum da 15 onns. Dapi in onn fa Deborah Zinsli part dal team. Ella dat invista da ses champ d'incumbensas e mussa cas actuals.

Il cuntè-tgiralla sin il monitur aveva in giuven da 15 onns – nus numnain el Nico – cun sai, cura ch'el è vegnì controllà da la polizia. Pli tard, a chaschun d'ina perquisiziun da ses dachasa, han ins chattà tar el differentas drogas purziunadas, sco tablettas dad ecstasy e marihuana ed er daners contants. «Las investigaziuns polizialas cuntinueschan. Sco ch'igl è sa mussà, n'è Nico numnadamain betg in dealer principal, mabain mo in currider», declera Deborah.

«Vid mia lavur ma plascha, che nus resguardain er l'ambient social dals giuvenils», di la polizista. En il center na stettia betg sco emprim in rapport da polizia, mabain da chattar il contact cun uffants e giuvenils. Temas sco mobing, squitsch da prestaziun, terapias actualas, daners da giaglioffa ed in eventual ambient difficil vegnan discutads. «Sco emprim vi jau bajegiar si in contact e vegnir a savair, sch'igl è necessari da prestar agid.» Tar l'emprim discurs cun la polizia, nua ch'ils geniturs èn savens preschents, saja spezialmain impurtant, da prender influenza en moda positiva. 

Rico Caratsch, il schef dal Servetsch da giuvenils, e Deborah discuteschan a maun da la preschentaziun d'in cas al flipchart ils novs connexs ch'ins ha chattà.

Tenuta spezialmain attenta
Delinquentas e delinquents giuvens tranter 10 e 18 onns ston vegnir interrogads en moda spezialmain sensibla. Rico Caratsch renviescha a la suandanta visiun dal servetsch da mediaziun Protecziun d'uffants Svizra: Uffants survegnan in access adattà al sistem da dretg, els vegnan tractads cun respect, els survegnan in sustegn direct per ademplir lur giavischs ed els vegnan rinforzads en lur resilienza. «Las directivas dal Cussegl da l'Europa per ina giustia adattada per uffants èn per nus centralas», di el.

Larmas fin stinanza
Er datti baruffas e blessuras corporalas che pretendan intervenziuns sco er l'assistenza per giuvenils che n'han betg sut controlla lur emoziuns. «Entant ch'ina giuvna ladra ha cumenzà a bragir, cura ch'ella è vegnida traplada d'in detectiv da la butia, èn autras stinadas ed engolan adina puspè products da cosmetica e parfums», raquinta Deborah.

Lavur repressiva
Il Servetsch da giuvenils lavura en emprima lingia en moda repressiva. Deborah e ses collegas – il Servetsch da giuvenils na lavura betg en unifurma – visitan però er lieus, nua ch'ils giuvenils s'inscuntran, per tschertgar il discurs cun els: «Tge faschais vus qua? Tge as occupa?» La finamira èsi da constatar a temp e d'impedir criminalitad da giuvenils. Latiers tutgan er in barat regular cun mainascolas e cun il post spezialisà Prevenziun da la Polizia chantunala dal Grischun. Ins raquinta in l'auter, tge che curra e passa e tge che occupa. Deborah lavura ensemen cun trais collegas en uffizi cumplain tar il Servetsch da giuvenils. Els vegnan sustegnids da referendarias e referendaris per fatgs da giuvenils sin las basas da polizia en las regiuns.