La Polizia chantunala dal Grischun organisescha mintg'onn in grond dumber d'occurrenzas d'infurmaziun en tut las regiuns dal chantun. La finamira da questas occurrenzas èsi d'infurmar persunas interessadas davart la professiun da polizist sco er da las dar ina invista autentica dal mintgadi d'ina polizista u d'in polizist.

Durant las occurrenzas survegnan las participantas ed ils participants infurmaziuns interessantas davart las incumbensas variadas da la polizia, davart las cundiziuns d'admissiun sco er davart l'instrucziun da polizia che dura 2 onns. Giuvnas polizistas e giuvens polizists raquintan da lur experientschas persunalas, da las sfidas e dals bels muments da lur mintgadi professiunal. Plinavant vegnan tematisads per exempel la lavur da team, meds d'acziun moderns e pussaivladads da far carriera entaifer la polizia.

Las occurrenzas d'infurmaziun èn in element da la Strategia HRM 2023–2033 che ha definì tranter auter la finamira, da posiziunar la Polizia chantunala dal Grischun sco patruna attractiva e da segirar a lunga vista il futur basegn da persunal. In champ d'acziun central da questa strategia èsi, da fascinar la glieud giuvna per la professiun da polizist e da gudagnar candidatas e candidats qualifitgads. Cun las occurrenzas d'infurmaziun regularas na vegn betg mo rinforzada la preschientscha da la polizia en la populaziun, mabain er furnida ina contribuziun impurtanta a favur da la promoziun da forzas giuvnas.

Las occurrenzas èn avertas per tut las persunas interessadas, saja quai giuvenils che tschertgan suenter il temp da scola obligatoric ina perspectiva professiunala captivanta, u persunas creschidas che s'interessan per ina midada da professiun. Tras il barat direct cun polizistas e polizists sa sviluppa in'atmosfera persunala e da confidenza che permetta da far dumondas e cussegliaziuns individualas.

Cun quest engaschament da la Polizia chantunala dal Grischun resta la professiun da polizist transparenta, accessibla ed attractiva – oz ed en l'avegnir.