Il 1. d'october 2025 han 18 novas aspirantas ed aspirants da la Polizia chantunala dal Grischun cumenzà lur scolaziun da 2 onns. Tar il Center da la polizia stradala nord han 7 dunnas ed 11 umens prendì per mauns plain plaschair e mirveglias in nov chapitel da lur vita, l'entrada en la professiun da polizia.

Ellas ed els han sco emprim configurà ils novs apparats da lavur. Cun lur convertibles e cun ils iPhones 15 resch novs èn las polizistas ed ils polizists futurs preparads fitg bain per il mintgadi digital. In mument spezial è suandà, cura ch'il cumandant Walter Schlegel ha surdà persunalmain las armas da servetsch ed ils certificats d'aspirants. Per blers è quai stà il cumenzament d'ina carriera captivanta e da gronda responsabladad. Er il tema segirezza da las datas n'è betg vegnì a la curta. Durant ina curta introducziun han las aspirantas ed ils aspirants emprendì da duvrar en moda segira infurmaziuns sensiblas en Microsoft 365 ed en Windows 11. Tractar conscientamain e cun responsabladad datas è oz ina part impurtanta da la lavur da la polizia moderna.

L'emprim di è vegnì terminà cun ina visita al Museum da la polizia, cun bowling e cun ina tschaina cuminaivla a Maiavilla. En il center è stà l'emprender d'enconuscher in l'auter, quai dal tuttafatg en il senn da la cultura averta ed apprezianta da la Polizia chantunala dal Grischun. 

Il segund di èn suandadas la surdada da l'unifurma, l'installaziun dals apparats radiofonics ed ina preschentaziun da l'Associaziun da polizia dal Grischun. Alura èsi ì vinavant ad Amriswil, nua che las aspirantas ed ils aspirants grischuns e lur collegas da tut la Svizra Orientala han cumenzà la scola da polizia.

Cun quest cumenzament da la scolaziun mussa la Polizia chantunala dal Grischun, ch'ella focussescha sin forzas giuvnas bain scoladas e motivadas. Ellas èn la clav per garantir er en l'avegnir la segirezza e la confidenza en il Grischun.