Il WEF dal schaner vegn spustà – per la squadra dal post spezialisà Prevenziun stat a disposiziun in spazi da temp che vul vegnir tratg a niz. Suenter in temp d'interrupziun vegn la prevenziun da traffic a las scolas professiunalas reactivada e concepida da nov. Pascal Vetsch instruescha il schaner en il Center da furmaziun Surselva a Glion.
Sco introducziun mussa Pascal Vetsch l'automobil patentà numer 1 da Benz, che datescha da l'onn 1886 ed in Bugatti Chiron da la generaziun dad oz, ch'è actualmain il hit sin tiktok. Cun quai ha el l'attenziun da 14 giuvenils – scrinaris, miradurs, mecatronists d'autos – en la vegliadetgna da 16 fin 19 onns. "Jau na sun betg l'inimi", di el, "oz vai numnadamain en emprima lingia per impedir accidents da traffic." Sin il program stattan ils temas surpassar a dretga, autoposer, chargia e visibilitad reducida, illuminaziun, rowdy sco er alcohol e drogas.
En connex cun la visibilitad reducida explitgescha Pascal duas decisiuns dal Tribunal federal. El mussa las consequenzas che quai ha, sch'ins n'allontanescha betg tut il glatsch da la fanestra davant da l'auto, uschia ch'ins vesa mo or d'ina cuchera, cura ch'ins va cun l'auto.
Manischunzs giuvens sco gruppa d'auta ristga
Ils manischunzs giuvens n'han savens anc betg l'exercizi e l'experientscha cun lur vehichels. Els na valiteschan perquai betg adina correctamain tschertas situaziuns da traffic u han schizunt in stil da charrar privlus. Ils accidents mortals a Laax ed a Castiel èn preschents a tuts. Ins senta la consternaziun en stanza. Pascal Vetsch: "Vus avais la responsabladad per vossas collegas e voss collegas che sesan cun vus en l'auto. E pensai a la suffrientscha per voss confamigliars, sche vus duessas disgraziar persuls."
Questa folia dat da pensar.
Tge custi, sch'ins va cun auto sut drogas?
Perquai che l'ultima classa ha tschentà fitg bleras dumondas davart ils custs d'in surpassament e d'in delict, porta Pascal Vetsch anc dapli exempels. El mussa, co ch'ins quinta la summa totala da la multa, dals custs da polizia e da las taxas. La finala respunda el dumondas sco "Dastg jau charrar cun l'auto cun il permiss da manischar a prova e prender cun mai collegas che han bavì?" u "Dastg jau installar ina illuminaziun da la part sut da l'auto, sche jau na l'envid betg durant che jau vom cun auto?"
Ir cun auto sut drogas po esser fitg char, quai daventa cler per tuts oz.
Pascal Vetsch resumescha a la fin da la lecziun "Tes cumportament influenzescha tes avegnir" e survegn applaus per sia lecziun captivanta davart la polizia en l'instrucziun da furmaziun generala IFG.