Tgenins èn stads ils messadis cun il pli grond success sin Facebook e sin Instagram durant l'onn 2021? La Polizia chantunala dal Grischun guarda enavos.
88 700 persunas èn vegnidas cuntanschidas sin Facebook, cura che – ils 14 da schaner – regivan relaziuns precaras sin via pervia da naiv. La Polizia chantunala dal Grischun aveva constatà: "Nossa supplica: Tgi che na sto betg exnum ir sin via, duai spustar ses viadi. Infurmaziuns davart il stadi da las vias chattais Vus sin www.strassen.gr.ch u sin www.strassenmobile.gr.ch. Nus As engraziain per Vossa chapientscha e per Vossa pazienza."
In messadi dals 15 da schaner 2022 ha dentant survegnì anc dapli likes:
La vart sensitiva da la polizia
Passa 102 000 persunas ha quest messadi cuntanschì. Quest text ha survegnì commentaris fitg positivs da blers amis: "A la Moesa a San Vittore. Questa cuntrada fluviala miraculusa cuvrida da prugina è anc durant l'entir di en la sumbriva. Ma ils dis creschan ed il sulegl arriva prest giu da las muntognas en la val. Nus As giavischain in zunt bel di. Vossa Polizia chantunala dal Grischun."
Schizunt a la Südostschweiz ha quest messadi plaschì ed ella ha tschentà online il titel: La vart sensitiva da nossa polizia. Che la Polizia chantunala dal Grischun sa dapli che dar multas e sa render tar accidents, cumprova ella cun in messadi sensitiv da la Val Mesauc sin Facebook.
Il messadi cun ils pli blers likes da la Polizia chantunala dal Grischun sin l'account dad Instagram dal chantun è stà quel dals 26 da december 2021 cun 794 likes: "Chattà in mument festiv ruassaivel durant il servetsch da notg."
