Il chantun Grischun rinforza la persistenza tar las acquisiziuns publicas. Cun novas prescripziuns promova la Regenza ina pratica d'acquisiziun responsabla che schanegia las resursas e che resguarda ils princips da l'economia circulara.

In bun exempel en quest connex è la Polizia chantunala dal Grischun. En in project da pilot sut l'egida da l'Uffizi d'informatica ha la Polizia chantunala per l'emprima giada cumprà ils telefonins en leasing. Suenter avair duvrà ils telefonins 2 fin 3 onns prenda il furnitur puspè enavos ils apparats. Sur ina fiera da secondhand procura el ch'els vegnian utilisads vinavant. Tar la publicaziun uffiziala è la persistenza vegnida valitada cun ina cumpart da 30 pertschient da la valitaziun generala.

Ils apparats vegnan remplazzads ina giada durant la durada dal contract da 5 onns. Per ch'ils telefonins possian lura puspè vegnir mess en circulaziun, èsi essenzial da duvrar els cun quità. Las var 580 collavuraturas e collavuraturs da la Polizia chantunala vegnan perquai sensibilisadas da chargiar l'accu tant sco pussaivel sin maximalmain 80%. Quai prolunghescha la vita da l'accu ed augmenta las schanzas da reutilisar ils apparats.

Il model da leasing na persvada betg mo ecologicamain, mabain er economicamain. Il chantun impunda ils daners da taglia en moda sistematica e spargnusa ed il medem mument profitescha el d'ina gronda clerezza dal preventiv per l'entira durada dal contract.