Il sectur "segirezza da las substanzas chemicas" ha l'incumbensa d'exequir en il chantun la legislaziun davart las substanzas chemicas, la legislaziun davart la protecziun cunter radiaziuns en il sectur dal radon, da far la controlla dals bogns e da las legionellas sco er da survegliar – en il rom da la segirezza biologica – las activitads cun organissems modifitgads geneticamain u cun organissems patogens en sistems serrads.

Las incumbensas concretas cumpiglian:

• controllar chemicalias e preparaziuns tar la producenta u tar il producent, en il commerzi sco er tar l'utilisadra u tar l'utilisader
• survegliar las concentraziuns dal gas radon en edifizis d'abitar, en scolas ed en edifizis publics; manar il cataster da radon
• controllar l'aua dals bogns sco er las chemicalias utilisadas
• prender emprovas da sistems d'aua chauda e controllar quests sistems, cunzunt l'aua da duscha sin "legionella pneumophila"
• registrar manaschis che lavuran cun organissems modifitgads geneticamain u cun organissems patogens e controllar las mesiras da segirezza
• organisar cussegliaziuns davart ils tissis da chasa e dar scleriments analitics simpels