Las incumbensas principalas da l'Uffizi per industria, mastergn e lavur (UCIML) cumpiglian l'intermediaziun publica da lavur e la cussegliaziun da persunas che tschertgan ina plazza sco er l'assicuranza cunter la dischoccupaziun. Plinavant s'engascha il UCIML per la segirezza al plaz da lavur sco er per la protecziun da la sanadad al plaz da lavur, per temps da paus adequats e per l'observanza dals salaris usitads en la branscha ed al lieu.

Intermediaziun da lavur

Il Center regiunal per intermediaziun da lavur (CIL) As porscha sustegn tar la tschertga d'ina plazza ed As cusseglia individualmain. El intermediescha plazzas adattadas ed As gida ad As annunziar cun success.

Cassa da dischoccupaziun

Sche Vus abitais en Svizra e daventais dischoccupada u dischoccupà, avais Vus per regla il dretg da survegnir prestaziuns da l'assicuranza cunter la dischoccupaziun. Las cassas da dischoccupaziun controlleschan, sche las premissas per survegnir contribuziuns èn ademplidas, e pajan alura las diarias.

Mesiras per il martgà da lavur

 Nus purschain differents curs e programs d'occupaziun, las uschenumnadas mesiras per il martgà da lavur. Questas mesiras duain gidar ad As qualifitgar en differents secturs per chattar pli svelt ina plazza da lavur adattada.

Inspecturat da lavur

L'Inspecturat chantunal da lavur è responsabel per exequir la Lescha da lavur. El controllescha la segirezza al plaz da lavur sco er la protecziun da la sanadad al plaz da lavur ed As cusseglia davart quests temas.

Cundiziuns da lavur

 Questa partiziun realisescha las mesiras accumpagnantas tar la Cunvegna davart la libra circulaziun da persunas e procura, che la Lescha federala davart la lavur illegala vegnia observada. Ella protegia las persunas cun activitad da gudogn cunter cundiziuns da salari e d'engaschament inadmissiblas e guarda, ch'ils standards che valan en Svizra vegnian observads.