Ils programs da promoziun chantunals han l'intent d'augmentar l'effizienza energetica d'edifizis existents e da remplazzar energias fossilas. Cumplementarmain duai il remplazzament da stgaudaments electrics vegnir accelerà. Sco gia explitgà en la resposta a l'incumbensa Derungs concernent contribuziuns per pumpas da stgaudar cun aria ed aua, vegnan contribuziuns da promoziun pajadas mo, sche las mesiras correspundan al stadi da la tecnica e sch'ils effects intenziunads vegnan cuntanschids.

Tenor l'incumbensa Hartmann duain vegnir resguardads, ultra da la temperatura media annuala da Meteo Svizra (cf. art. 47 da l'Ordinaziun d'energia dal chantun Grischun [OEG; DG 820.210]), er auters criteris per calcular las contribuziuns da promoziun per las pumpas da stgaudar cun aria ed aua (sco la temperatura d'afflussiun dal sistem da stgaudar, l'effizienza energetica dal sistem da la pumpa da stgaudar tschernì, quai resguardond eventuals indrizs fotovoltaics ed eventuals accumulaturs d'energia). Per il schaner 2022 è vegnida actualisada la norma T 9120 concernent la temperatura media annuala. Quai ha gì per consequenza che da nov pon profitar ulteriurs territoris dal chantun da las contribuziuns da promoziun.

Sch'ils criteris proponids vegnissan realisads en la pratica da promoziun chantunala, avess quai per consequenza, che la lavur administrativa e da planisaziun s'augmentass fermamain per ils installaturs. Mintga edifizi ha autras cundiziuns generalas. Savens n'èn ils documents da planisaziun dal sistem da stgaudar existent e/u da l'edifizi betg pli avant maun. Questas basas stuessan perquai (per part) vegnir elavuradas da nov, sch'il producider da chalur vegniss remplazzà. Cun ina dumonda da contribuziun na stuess betg mo vegnir inoltrada la calculaziun da la prestaziun da stgaudar ch'è necessaria, mabain er la dimensiun da l'entir sistem da distribuziun da chalur, quai resguardond il standard existent da l'isolaziun termica da l'edifizi. Plinavant stuess vegnir calculada l'effizienza da la pumpa da stgaudar planisada resguardond las cundiziuns generalas menziunadas qua survart e resguardond ils eventuals retgavs d'in indriz fotovoltaic.

Sch'ins metta en relaziun questa lavur cun las contribuziuns da promoziun che resultan eventualmain, è questa lavur sproporziunada. Gia oz admonescha la mastergnanza d'installaziun, che la lavur administrativa per survegnir contribuziuns da promoziun saja gronda. Ulteriurs criteris mo retardassan la midada svelta giavischada ad in sistem da stgaudar cun energias regenerablas. La simpla metoda actuala cun la temperatura media annuala na po bain betg resguardar tut ils facturs, ma questa metoda garantescha, che pumpas da stgaudar ineffizientas vegnan excludidas da la promoziun. Perquai duai vegnir desistì da determinar criteris supplementars per eruir il dretg da survegnir contribuziuns per pumpas da stgaudar. Tuttina è la Regenza conscienta dal problem, che tscherts territoris en il chantun na pon betg profitar d'ina promoziun da pumpas da stgaudar cun aria ed aua, pervia da lur situaziun geografica e pervia da la temperatura media annuala respectiva. Vitiers vegn ch'en quests lieus pon bain vegnir realisadas pumpas da stgaudar cun aua da sal ed aua (sondas geotermicas). Da tals projects resultassan dentant custs d'investiziun pli auts ch'en cas da pumpas da stgaudar cun aria ed aua. Perquai è la Regenza pronta d'examinar correspundentamain la pratica da promoziun chantunala e da stgaffir uschia la pussaivladad da conceder contribuziuns chantunalas pli autas per pumpas da stgaudar cun aua da sal ed aua effizientas. Cumpetent per elavurar las directivas executivas en chaussa è il Departament d'infrastructura, energia e mobilitad (DIEM; art. 55 OEG).

Sa basond sin questas explicaziuns propona la Regenza al Cussegl grond da midar questa incumbensa sco suonda:

La Regenza vegn incumbensada d'examinar e d'adattar correspundentamain l'autezza actuala da las contribuziuns da promoziun per sondas geotermicas.

1. da mars 2023