Navigation

Inhaltsbereich

Dumonda da la fracziun da la PPS concernent custs, cifras e fatgs areguard l'alloschament e l'assistenza da fugitivas e fugitivs sco er da requirentas e requirents d'asil en il chantun (emprim sutsegnader Salis)

Sessiun: 07.12.2022

La Svizra ha ina tradiziun umanitara. Ella retschaiva persunas ch'èn persequitadas areguard il corp e la vita. La politica d'asil e da migraziun daventa dentant diffusa. Migrantas e migrants economics maldovran la tradiziun umanitara numnada. Ellas ed els engrevgeschan enormamain la cassa statala. En la populaziun vegni supponì ch'ils custs explodeschian e la criminalitad sco er ils problems socials respectivs s'augmentian.

Tenor las ultimas calculaziuns approximativas èsi da quintar en il proxim futur cun circa 100 000 requirentas e requirents d'asil sco er cun 70 000 ulteriuras fugitivas ed ulteriurs fugitivs da l'Ucraina. Il dumber da requirentas e requirents d'asil duai esser s'augmentà l'october 2022 per 20 pertschient en cumparegliaziun cun il mais precedent. L'october da quest onn è plinavant vegnì attribuì en noss pajais a 2360 persunas fugidas da l'Ucraina il status da protecziun S. La pretensiun da rinforzar las guardias da cunfin tras l'armada sa fa udir.

Er il chantun da cunfin Grischun (Engiadina e las vals dal sid) sto s'occupar da questa situaziun e prender conclusiuns e mesiras (collocaziun, instrucziun e.u.v.).

Las commembras ed ils commembers da la fracziun da la PPS èn preoccupads. Perquai dumondan ellas ed els la Regenza il suandant:

  1. Co è – en cifras – l'occupaziun dals centers d'asil, dals alloschis e dals indrizs sumegliants en il chantun ed en sias regiuns?
  2. Tge mesiras èn previsas en cas d'ina suroccupaziun e d'ina sutoccupaziun dals alloschis attribuids oz en las regiuns? Tge alloschis ed instituziuns èn en planisaziun respectivamain en reserva e nua èn questas instituziuns planisadas?
  3. Quant auta è en noss chantun la cumpart da persunas dal sectur d'asil e da fugitivs tar acziuns da la polizia, tar proceduras d'investigaziun da la polizia e tar proceduras penalas (procura publica, dretgiras penalas) e da tge naziunalitads sa tracti?
  4. Quant aut è il dumber da fugitivas e fugitivs da l'Ucraina e quant aut è il dumber da persunas cun status da protecziun S?
  5. Quant aut è – differenzià tenor naziunalitads – il dumber da fugitivas e fugitivs sco er da requirentas e requirents d'asil che survegnan assistenza ed alloschi (tras instituziuns privatas) ordaifer las instituziuns existentas dal chantun en las regiuns?
  6. Tge èn las consequenzas finanzialas per il chantun e per sias vischnancas, e quai actualmain sco er en cas da supposiziuns da worst case?
  7. Èsi – areguard la situaziun da fugitivs e d'asil supponida – commensurà d'abolir ils posts da polizia a Castasegna, Martina e Campocologno, ed èsi – ord vista da las acziuns e dal persunal – insumma anc raschunaivel, respectivamain da responsar da servir quests lieus davent da Scuol, Samedan e Poschiavo? Sche betg, è la Regenza pronta d'annullar bainbaud l'aboliziun da quests posts (bain chapì posts da cunfin!), en spezial er la cuvrida/segirezza poliziala da la populaziun, tras ina cuvrida poliziala staziunara da las vals lateralas?
  8. È la Regenza pronta d'infurmar mensilmain las vischnancas e la populaziun chantunala davart las cifras ed ils custs actuals en il sectur d'asil e da fugitivs e – sche gea – en tge furma (concept d'infurmaziun)?

Cuira, ils 7 da december 2022

Salis, Metzger, Candrian, Adank, Brandenburger, Butzerin, Casutt, Cortesi, Della Cà, Dürler, Favre Accola, Gort, Grass, Hefti, Hug, Koch, Krättli, Lehner, Menghini-Inauen, Morf, Rauch, Roffler, Sgier, Stocker, Weber

Resposta da la regenza

Tar la dumonda 1: Ils 20-02-2023 era l'occupaziun dals centers d'asil, dals alloschis  e d'indrizs sumegliants en il chantun 64,74 %: 516 persunas dal sectur d'asil usità e 471 persunas da l'Ucraina cun status da protecziun S.

Tar la dumonda 2: Per lieu e per stabiliment vegn definì in dumber da plazzaments maximalmain pussaivel che po per in curt temp vegnir surpassà minimalmain, sch'i dat stretgas da plazzaments. L'onn 2015 è il dumber da plazzaments maximal vegnì surpassà l'ultima giada per intginas emnas. Actualmain èn 14 alloschis collectivs en las suandantas vischnancas pronts per il diever: Arosa, Cazas, Tavau (2), Mustér, Cuira (4), Churwalden, Grüsch, Laax, Roveredo, Trimmis e Val Müstair sco er il cen­ter d'expulsiun Flüeli. Sche necessari stattan mintgamai a disposiziun in alloschi pli grond sin il territori da la vischnanca da Luzein, da Samedan sco er in stabiliment sutterran a Cuira per als prender en funcziun entaifer in curt termin.

Tar la dumonda 3: La cumpart da persunas dal sectur d'asil e da fugitivs en connex cun acziuns da la polizia/proceduras da retschertga/proceduras penalas importava l'onn 2022 4 %, quella da persunas cun status da protecziun S 0,1 %. Tar las per­sunas dal sectur d'asil e da fugitivs sa tractavi da las suandantas naziunalitads: Eritrea (17 %), Algeria (14 %), Irac (10 %), Afganistan (8 %), Georgia (8 %), Siria (7 %), Serbia (5 %).

Tar la dumonda 4: Totalmain 1798 persunas da l'Ucraina èn vegnidas assegnadas al chantun Grischun, da quellas 1738 persunas cun status da protecziun S (stadi 20-02-2023). Ils 20-02-2023 sa trategnevan 1415 da quellas persunas en il chantun Gri­schun.

Tar la dumonda 5: Ils 20-02-2023 sa chattavan totalmain 1361 persunas dal sectur da fugitivs e d'asil en il chantun Grischun. 822 persunas abitavan ordaifer las institu­ziuns existentas dal chantun (en alloschis privats). 203 persunas Afganistan, 3 per­­sunas Albania, 2 persunas Angola, 17 persunas Etiopia, 1 persuna Bosnia, 34 persu­nas China, 1 persuna Costa d'Ivur, 236 persunas Eritrea, 31 persunas Irac, 21 per­sunas Iran, 5 persunas Camerun, 2 persunas Congo, 13 persunas Cosovo, 1 pers­una Croazia, 1 persuna Libia, 2 persunas Nigeria, 4 persunas Pakistan, 3 persunas Russia, 17 persunas Serbia, 41 persunas Somalia, 48 persunas Sri Lanka, 3 pers­unas Sudan, 76 persunas Siria, 1 persuna Tansania, 45 persunas Tirchia, 1 persuna Uganda, 1 persuna Belarus, 8 persunas senza naziunalitad, 1 persuna derivanza nun­enconuschenta. 945 persunas da las 1415 persunas da l'Ucraina abitavan – stadi dals 20-02-2023 – en alloschis privats. 980 persunas cun il status da protecziun S vegnivan assistidas tras ils servetschs socials chantunals (stadi 20-02-2023).

Tar la dumonda 6: Las consequenzas finanzialas èn dependentas da la durada da la dimora en il chantun Grischun. Requirentas e requirents d'asil, persunas admessas provisoricamain, persunas cun status da protecziun S sco er fugitivas e fugitivs reco­n­uschids ed admess provisoricamain èn ils emprims onns per regla senza activitad da gudogn e vegnan promovids linguisticamain e professiunalmain en il rom da l'Age­nda d'integraziun svizra AIS. Dependentamain dal status paja la Confederaziun al chantun resp. a las vischnancas pauschalas globalas che vegnan impundidas per sustegnair questas persunas. En il rom da l'incumbensa Niederer dals 09-12-2015 concernent ina solidarisaziun pertutgant ils custs da l'agid social per las fugitivas ed ils fugitivs renconuschids ha la Regenza adattà il pajament da las pauschalas globa­las a las vischnancas a la dimensiun dal dossier da las fugitivas e dals fugitivs recon­uschids ed admess provisoricamain. Emprovas da controlla han mussà che las pre­staziuns da sustegn vegnan per gronda part cuvridas cumplettamain cun il mecanis­sem da distribuziun. Sin basa da la pratica vertenta na resultan al chantun ed a las vischnancas ils emprims 5 resp. 7 onns en il sectur da las prestaziuns da sustegn perquai naginas u relativamain paucas expensas.

Tar la dumonda 7: Abolids èn vegnids ils posts da polizia a Martina ed a Campo­cologno. A Castasegna vegn l'infrastructura da biro anc adina duvrada. Cun la strategia chantunala d'immobiglias èsi vegnì concludì da crear nov ferms centers administrativs regiunals repartids en il chantun. Otg da quests centers èn vegnids realisads en il fratemp. En tut ils centers è er la Polizia chantunala dal Grischun sa chasada. Ord vista tactica, organisatorica è la Polizia chantunala dal Grischun oz, sa basond sin la mobilitad ch'è vegnida stgaffida en il sectur d'informatica e da vehichels ils ultims onns, fitg agila e betg pli dependenta dal lieu. La centralisaziun da las for­zas en l'Engiadina Ota, en il Puschlav ed en l'Engiadina Bassa è sa cumprovada e promova la preschientscha mobila da la Polizia chantunala dal Grischun en l'entira regiun d'acziun. Questa circumstanza ha in effect positiv sin ils temps d'intervenziun. Sin basa dal svilup social èsi daventà fitg difficil da pudair tegnair persunal en las valladas al sid. Lieus da servetsch pitschens èn antiquads e na sa laschan er betg render cumpatibels cun la pretensiun da plazzas da lavur attractivas.

Tar la dumonda 8: La Confederaziun conceda la pauschala globala e la part da basa da la pauschala per l'agid d'urgenza mintga quartal; la part da cumpensaziun da la pauschala d'agid d'urgenza e la pauschala per ils custs administrativs vegnan den­tant pajadas annualmain als chantuns. Ina publicaziun mensila da las cifras actualas n'è perquai betg realisabla. Ils custs ed ils retgavs effectivs chattan ins en il quint annual chantunal sut il sectur d'asil e las cifras da la statistica d'asil publitgescha il Secretariat da stadi per migraziun (www.sem.admin.ch/sem/de/home/publiservice/statistik/asylstatistik.html).

1. da mars 2023