Dumonda Nick concernent la situaziun dal traffic al center da traffic tar l'access a l'autostrada a Landquart
Sessiun: 07.12.2009
Per l'access a l'autostrada a Landquart ha l'avertura dal Rain alpin Outlet Village chaschunà la situaziun da traffic fitg problematica ch'era vegnida spetgada.
Pertutgads da quai n'èn betg mo las visitadras ed ils visitaders dal Rain alpin Outlet Village, mabain en spezial las vias d'access al lieu d'industria Tardis sco er il traffic per motivs da lavur.
Il center da traffic a Landquart – sco portal vers il Grischun – è dentant er da gronda impurtanza per il traffic turistic en spezial vers Claustra – Tavau.
Pervia da la situaziun precara dal traffic faschain nus las suandantas dumondas a la regenza:
1. Co giuditgescha la regenza la situaziun dal traffic al center da traffic tar l'access a l'autostrada a Landquart?
2. Tge mesiras a curta vista ha la regenza l'intenziun da prender per meglierar la situaziun?
3. Tge poi vegnir fatg a vista mesauna ed a lunga vista?
4. È la regenza eventualmain pronta da reclassifitgar las vias?
Cuira, ils 7 da december 2009
Nick, Nigg, Jeker, Brandenburger, Dudli, Möhr, Pfiffner-Bearth
Resposta da la regenza
L'access a l'autostrada a Landquart è vegnì renovà ils onns 2001 fin 2003. Quella giada è stada la finamira da colliar meglier il territori industrial dad Igis-Landquart/Zizers cun la rait surordinada da las vias naziunalas e principalas. La domiciliaziun da las singulas interpresas en il territori industrial n'è betg chaussa dal chantun. Las pussaivladads dal chantun da prender influenza p.ex. areguard las prescripziuns d'access èn perquai minimalas.
Davart las dumondas concretas s'exprima la regenza sco suonda:
1. La regenza persequitescha il svilup da la situaziun dal traffic dapi l'avertura dal Rain alpin Outlet Village, en spezial il privel da bloccar il vial da franar da la sortida da la via naziunala nà da Cuira, perquai che talas bloccadas pon chaschunar in problem da segirezza che na dastga betg vegnir sutvalità.
2. Perquai ch'il traject da via pertutgà sa chatta en il perimeter da la via naziunala, è l'uffizi federal da vias (UVIAS) – dapi l'entrada en vigur da la NGF – responsabel e cumpetent per mesiras architectonicas. A curta vista vesa la regenza mo pussaivladads en il sectur dal manaschi che pudessan meglierar la situaziun (avertiment da la stagnaziun dal traffic sin la A13, regulaziun dal traffic sin via per l'access e per la sortida dal parcadi).
3. L'uffizi da construcziun bassa dal Grischun ha gia fatg emprimas ponderaziuns avant la realisaziun dal Outlet Village. Per augmentar la capacitad da prestaziun da la rundella da la via naziunala A28 è vegnì elavurà in studi da realisabladad per in uschenumnà bypass en direcziun dal Partenz. Quest studi è vegnì surdà a l'UVIAS per elavurar vinavant. Sin basa da las experientschas fatgas vegn la regenza ad insister tar l'UVIAS, per che la segirezza dal traffic ed il moviment dal traffic restian garantids cun agid da mesiras adattadas ed utilas.
4. Sco gia menziunà è il traject tranter las duas rundellas ina part integrala da la rait da las vias naziunalas. L'avertura locala detagliada entaifer la vischnanca e pia er entaifer il territori industrial Tardis è chaussa da la vischnanca. En quest cas na datti nagin motiv da far ina reclassificaziun. Ultra da quai na midassan novas relaziuns da proprietad nagut vi da la situaziun actuala dal traffic.
27 da schaner 2010