Sin basa d'ina stimaziun conservativa da l'institut svizzer per la prevenziun da l'alcoholissem e d'autras toxicomanias (ISPA) vivan en Svizra ca. 100'000 uffants e giuvenils cun in genitur dependent d'alcohol. Savens na pon quests uffants betg parter lur quitads, perquai che lur situaziun na vegn strusch percepida e perquai ch'i na dat per els mo paucas purschidas d'agid al lieu. Er sch'ils geniturs dependents d'alcohol èn en terapia, na s'interessa savens nagin per ils uffants. L'alcoholissem dal genitur dependent determinescha dentant massivamain il mintgadi da quests uffants, e la tgira genituriala è incalculabla. Savens èn ils uffants pertutgads surlaschads a sasezs u ston schizunt anc avair quità dals geniturs. Blers uffants sa turpegian per lur geniturs e na gughegian betg pli da prender a chasa amias ed amis. Ina isolaziun sociala po esser la consequenza da quai. Ils uffants da famiglias che pateschan sut l'alcohol èn ultra da quai – tenor il ISPA – sis giadas pli periclitads da sviluppar sezs ina dependenza d'alcohol.
Tenor las infurmaziuns dal ZEPRA (center per prevenziun e promoziun da la sanadad da noss chantun) datti effectivamain ina largia en quest sectur en il Grischun. I na dat ni in post da consultaziun concret ni in project correspundent per uffants pertutgads. Il medem conferman differentas persunas d'instrucziun sco er medias e medis per uffants.
Las sutsegnadras ed ils sutsegnaders supplitgeschan la regenza da respunder las suandantas dumondas:
1. Èn las persunas spezialisadas correspundentas da noss chantun conscientas da la problematica numnada?
2. Sche gea, exista ina cooperaziun tranter las persunas spezialisadas dal sectur scolastic, social, medicinal e terapeutic?
3. Èn planisads en noss chantun purschidas d'agid e projects concrets per uffants e per giuvenils pertutgads?
Cuira, ils 8 da december 2009
Meyer Persili (Cuira), Jäger, Meyer-Grass (Claustra Vitg), Arquint, Baselgia-Brunner, Blumenthal, Brüesch, Bucher-Brini, Buchli, Cahannes Renggli, Campell, Casparis-Nigg, Castelberg-Fleischhauer, Caviezel (Pitasch), Caviezel-Sutter (Tusaun), Christoffel-Casty, Claus, Darms-Landolt, Dermont, Frigg-Walt, Gartmann-Albin, Hardegger, Jaag, Kleis-Kümin, Krättli-Lori, Kunz, Menge, Noi-Togni, Parolini, Peer, Peyer, Pfiffner-Bearth, Pfister, Righetti, Stoffel (Valragn), Thöny, Thurner-Steier, Trepp, Vetsch (Pragg-Jenaz), Furrer-Cabalzar, Largiadèr
Resposta da la regenza
Uffants da geniturs dependents d'alcohol pateschan massivamain da la dependenza d'alcohol da lur geniturs. Quai po chaschunar mals psichics e corporals cun lungas consequenzas. Tenor il program naziunal Alcohol 2008–2012 vivan en Svizra – tut tenor la stimaziun – fin 110'000 uffants che han almain in genitur cun in consum d'alcohol problematic respectivamain cun ina dependenza d'alcohol. Differents studis cumprovan las grondas grevezzas psichicas e socialas, a las qualas ils uffants da persunas dependentas d'alcohol èn exponids. Tar ils uffants pertutgads exista cumprovadamain er in privel augmentà da sviluppar pli tard sezs in cumportament problematic areguard l'alcohol.
Il program naziunal Alcohol 2008–2012 postulescha correspundentamain ch'i vegnian messas a disposiziun ad uffants ed a giuvenils purschidas d'agid per la protecziun cunter disturbis psichics e fisics che duain esser accessiblas uschè bain sco pussaivel. Per quest intent duain vegnir serradas las largias da purschida e d'infurmaziun per uffants e per giuvenils da famiglias che pateschan sut l'alcohol. Tut ils uffants e giuvenils pertutgads duain survegnir in sustegn che correspunda a lur vegliadetgna, per dar dumogn a las grevezzas psichicas e socialas. Persunas spezialisadas dals posts da cussegliaziun per dumondas d'alcohol e da dependenza, dals servetschs socials e da las autoritads tutelaras duain vegnir sensibilisadas e qualifitgadas per questa tematica. Las purschidas duain vegnir rendidas enconuschentas confurm a las gruppas en mira, cun la finamira che uffants e giuvenils che basegnan sustegn, perquai ch'els derivan da famiglias che pateschan sut l'alcohol, tirian a niz pli savens ed a temp las purschidas da cussegliaziun.
La regenza respunda las dumondas tschentadas sco suonda:
1. Ils posts spezialisads e las persunas spezialisadas dal sectur social e psichiatric sco er dal sectur tutelar èn conscients da las consequenzas ch'ina dependenza d'alcohol da geniturs ha per ils uffants da quests geniturs. Medemamain ha la regenza gia rendì attent il cumenzament da l'onn 2008, a chaschun da l'audiziun tar il program naziunal Alcohol 2008–2012, che la prioritad stoppia vegnir dada a mesiras che concernan uffants e giuvenils da famiglias che pateschan sut l'alcohol.
2. Gea. Ils servetschs socials chantunals e regiunals spezialisads (post spezialisà per la protecziun da l'uffant/servetsch social per dumondas da dependenza) cusseglian ils uffants – nua che quai è inditgà – en moda interdisciplinara, integrond medias e medis, terapeutas e terapeuts sco er cussegliadras e cussegliaders da scola e d'educaziun. Ils servetschs psichiatrics dal Grischun (SPGR) da lur vart sustegnan ils uffants da geniturs ch'èn dependents d'alcohol e che vegnan tractads en moda staziunara u ambulanta, integrond ils servetschs socials da las clinicas e dals servetschs socials regiunals. Tut tenor la situaziun vegn er fatga in'annunzia a l'autoritad tutelara cumpetenta.
3. L'uffizi dal servetsch social elavura actualmain in concept per in program d'alcohol chantunal che duai realisar sin plaun chantunal il program naziunal Alcohol 2008–2012. En quest connex vegni examinà en spezial, quant enavant ch'i dovra purschidas supplementaras per uffants e per giuvenils pertutgads. A questa lavur èn participadas tut las organisaziuns impurtantas dals secturs da la prevenziun, da la cussegliaziun sociala e da la terapia.
Actualmain èsi previs d'orientar e da sensibilisar cun ina campagna d'infurmaziun davart la problematica dals uffants e dals giuvenils da famiglias che pateschan sut l'alcohol. Plinavant èsi planisà da sviluppar concepts da cussegliaziun spezials. La finala duain las collavuraturas ed ils collavuraturs dals secturs da la scola, da la scolina, da la medischina, da la psichiatria sco er dals servetschs socials e da l'avugadia vegnir sensibilisads per la problematica en dumonda.
Ils SPGR ed il servetsch psichiatric per uffants e giuvenils dal Grischun (SPUG) elavuran actualmain in concept d'assistenza per uffants da geniturs ch'èn ospitalisads pervia d'ina malsogna psichica. Qua tras duain vegnir cumpigliads – almain en ina dimensiun restrenschida – er uffants da geniturs cun ina dependenza.
La suprastanza da la federaziun tutelara dal Grischun planisescha da tematisar durant l'onn current la problematica d'uffants da geniturs dependents d'alcohol en il rom d'ina occurrenza d'infurmaziun per mandatarias e per mandataris privats.
17 da mars 2010