Independentamain dal resultat da la votaziun dal pievel davart l'iniziativa per in advocat dals animals – il resultat vegn ad esser enconuschent, avant che la resposta da questa dumonda è avant maun – datti en egl en la statistica davart ils cas concernent la protecziun dals animals ch'igl existan grondas differenzas tranter ils chantuns areguard l'execuziun da la legislaziun federala davart la protecziun dals animals.
La voluntad politica da persequitar e da chastiar delicts cunter animals para dad esser sviluppada differentamain en ils divers chantuns. Quai mussa la statistica dals cas da la fundaziun per l'animal en il dretg (TIR), nua ch'i vegnan registrads tut ils cas concernent la protecziun dals animals dals onns 1982 fin 2008. Bunamain in terz da tut ils cas registrads derivan dal chantun Turitg (2053 cas). (Ulteriurs exempels èn: SG 1082 cas, BE 649 cas, AG 537 cas). Il chantun Grischun cun 134 cas ha en quest temp in dumber relativamain pitschen.
Pervia da quai ans drizzain nus a la regenza cun las suandantas dumondas:
1. A tge attribuescha la regenza questas differenzas evidentas areguard il dumber da cas annunziads?
2. Quants cas da maltractament d'animals e/u da negligientscha d'animals èn vegnids inoltrads ils ultims 3 onns tar l'uffizi cumpetent e co è la relaziun tranter las annunzias sur la polizia chantunala dal Grischun/sur l'uffizi per la sanadad d'animals e sur la societad grischuna per la protecziun dals animals?
3. Quants cas annunziads èn vegnids persequitads vinavant ils ultims 3 onns?
4. Quants scumonds da tegnair animals èn vegnids pronunziads?
5. Quants pajaments directs a manaschis purils èn vegnids scursanids ed en media en tge dimensiun èn quels vegnids scursanids?
6. Quant auta è la summa media da las multas pronunziadas?
Cuira, ils 15 da favrer 2010
Gartmann-Albin, Frigg-Walt, Trepp, Arquint, Baselgia-Brunner, Bucher-Brini, Jaag, Jäger, Menge, Meyer-Persili (Cuira), Peyer, Pfenninger, Pfiffner-Bearth, Thöny, Locher Benguerel
Resposta da la regenza
En il chantun Grischun è l'uffizi per la segirezza da victualias e per la sanadad d'animals (USVA) responsabel per exequir la legislaziun davart la protecziun dals animals. Las proceduras penalas vegnan manadas dal departament d'economia publica e fatgs socials (DES), da la procura publica (Ppu) sco er da las presidentas cirquitalas e dals presidents cirquitals. L'uffizi d'agricultura e da geoinfurmaziun (UAG) po scursanir pajaments directs. La regenza na po betg decider libramain, tge cas che duain vegnir persequitads e tgenins betg. Uschiglio na tegna ella betg quint da l'execuziun da la lescha davart la protecziun dals animals. Il USVA persequitescha perquai mintga annunzia concernent cuntravenziuns cunter la legislaziun davart la protecziun dals animals. Annunzias vegnan fatgas da la polizia chantunala (Pocha), da las autoritads d'inquisiziun d'auters chantuns, da persunas privatas, da survegliadras e da survegliaders da chatscha sco er da vischnancas. Il USVA sez fa medemamain observaziuns a chaschun da sias controllas. Betg mintga annunzia n'ha dentant la medema qualitad. Perquai na sto betg mintga cas implitgar mesiras u in chasti. Las bleras proceduras avertas vegnan dentant concludidas cun ina disposiziun da mesiras u da chastis. La statistica dals cas che vegn menziunada en la dumonda lascha concluder ch'il chantun Grischun ha proporziunadamain paucs cas penals en connex cun la protecziun dals animals. Tenor la statistica sa mussa la situaziun areguard il dumber dals cas per ils onns 1982 fin 2008 sco suonda: chantun Turitg (ZH) 2'052 cas, SG 1'082, BE 649, AG 537, LU 415, VD 379, FR 163, SO 161, BS 159, GR 134, SH 115. Tut ils auters chantuns han main che 100 cas: AI, GL, OW, TI, VS èn registrads cun main che 1 cas per onn, GE, NW ed UR cun main che 0.5 cas per onn. Quai mussa d'ina vart ch'il Grischun sa chatta circa en la media, da l'autra vart, che la statistica n'è strusch represchentativa resp. cumpletta. Ella registrescha mo las proceduras che vegnan annunziadas a la confederaziun ed è perquai dependenta da la prontezza da differentas autoritads en ils chantuns d'annunziar ils cas.
1. La regenza attribuescha las differenzas en la statistica a l'incumplettezza da quellas. I na vegnan senza dubi betg annunziads tut ils cas penals en connex cun la protecziun dals animals dals chantuns. I n'è dentant betg chaussa da la regenza da valitar questa statistica areguard sia qualitad. En mintga cas sa chatta il chantun Grischun circa en la media tenor la statistica, sch'ins considerescha tut las valitaziuns. Quai mussa en spezial che las autoritads chantunalas cumpetentas ageschan cun buna mesira.
2. Ils ultims 3 onns èn vegnidas fatgas var 260 annunzias tar il USVA, quai correspunda circa ad 80 annunzias per onn. Il sectur da las morsas da chaun è exclus da quai. Tar il DES èn vegnidas inoltradas totalmain 31 annunzias da cuntravenziuns cunter la legislaziun davart la protecziun dals animals da l'onn 2007 fin ils 21 d'avrigl 2010 (pia circa 10 per onn). 90 % da las annunzias a l'uffizi èn vegnidas fatgas da persunas privatas. Las annunzias al departament na vegnan betg registradas sistematicamain. La gronda part vegn fatga da la Pocha resp. dal USVA. Tenor l'examinaziun summarica ha la societad grischuna per la protecziun dals animals inoltrà duas denunzias penalas. Savens collavuran la Pocha ed il USVA tar la registraziun dals causals. La relaziun tranter las annunzias da la Pocha e quellas dal USVA na po perquai betg vegnir stimada.
3. Da princip vegnan tut las annunzias scleridas ed eventualmain persequitadas vinavant. Il USVA ha realisà ils onns 2007 fin 2009 totalmain 246 controllas are-guard la protecziun dals animals en tratgas d'animals da chasa e d'animals da niz ed ha inizià mesiras correspundentas resp. ha fatg in'annunzia al DES. En il DES èn vegnidas liquidadas dals onns 2007 fin 2009 totalmain 26 proceduras penalas. En la medema perioda ha la Ppu manà 14 proceduras penalas. Betg cuntegnids èn en quest connex tals cas che pertutgan mo secundarmain causals da la legislaziun davart la protecziun dals animals. Consequentamain poi esser ch'i vegnan agiuntads 5 fin 10 cas. Il dumber da las proceduras, che la presidenta u ch'il president cirquital maina, n'è betg enconuschent.
4. In scumond da tegnair animals è ina mesira rigurusa ch'è mo pussaivla sut premissas severas. En il Grischun èn vegnids pronunziads correspundentamain dus scumonds da tegnair animals. En circa ina dunsaina da cas n'è il scumond da tegnair animals ch'era vegnì smanatschà betg vegnì exequì, e quai pervia da la liquidaziun da la tratga d'animals e dal manaschi.
5. L'onn 2009 ha il UAG scursanì ils pajaments directs a manaschis purils en tut per 32'374.– francs (45 manaschis, 200.– fin 3'400.–). L'onn 2008 per 12'755.– francs (25 manaschis, 200.– fin 1'680.–). L'onn 2007 per 15'870.– francs (17 manaschis, 200.– fin 4'000.–). Ina reducziun po avair ulteriuras consequenzas (p.ex. stritgada da contribuziuns or d'auters programs sco SORTA, STB).
6. En cas da surpassaments è la media da las multas 200.– francs. En cas da delicts è la fixaziun dal chasti fitg individuala, uschia ch'i na po betg vegnir inditgada ina media en quest connex. Latiers vegnan mintgamai las taxas per las disposiziuns che importan en l'administraziun per regla per tals cas tranter 150.– e 500.– francs.
5 da matg 2010