Ils 21 da favrer 1974 ha il cussegl grond approvà cun 70 cunter 13 vuschs la missiva dals 3 da december 1973 davart la construcziun d'ina nova colliaziun da la via dal Güglia e dal Scanvetg cun ina punt auta.
Ils 5 da fanadur 2005 ha la regenza acceptà l'incumbensa Casty e consutsegnaders concernent la reactivaziun dal project "colliaziun da la via dal Güglia e dal Scanvetg cun ina punt auta sur la Plessur a Maladers".
L'avust 2006, suenter ch'il studi da realisabladad è stà avant maun, èn l'uffizi da construcziun bassa e la regenza vegnids a la conclusiun che la punt auta da son Luzi saja realisabla e ch'ella saja da preferir envers ina renovaziun da la veglia via dal Scanvetg che circumdescha la curt episcopala. Immediatamain ha l'uffizi chantunal da construcziun bassa elavurà in project d'exposiziun. Actualmain vegnan tractadas las protestas inoltradas.
Quest project è vegnì integrà sco project d'aglomeraziun en il program d'aglomeraziun da la confederaziun, la quala ha garantì ina confinanziaziun sin il stgalim da prioritad A. En il rapport dals 12 da december 2008, sut la mesira 13 "colliaziun laterala en il Scanvetg", ha l'uffizi federal da svilup dal territori (ARE) dentant degradà il project dal stgalim da prioritad A al stgalim da prioritad C. Il project duai vegnir examinà en la fasa da realisaziun dals onns 2015 fin 2018. Ma er alura vegn la punt auta mesirada e cumparegliada – en il rom da l'analisa dals custs e dal niz – cun auters projects da tut la Svizra. La construcziun da la colliaziun laterala en il Scanvetg cun la punt auta a Cuira è – per la citad da Cuira e per sia aglomeraziun sco er per il lieu da turissem Arosa e per la vallada dal Scanvetg – in basegn urgent ch'è incontestà en il program d'aglomeraziun "Cuira" dal chantun.
Davart la relevanza per l'aglomeraziun cuntegna il rapport dal chantun dals 20 da november 2007 il suandant:
"La mesira 13 'colliaziun laterala en il Scanvetg' ha ina impurtanza considerabla per dar dumogn al traffic d'aglomeraziun. Senza questa mesira na pudess ins betg dischlocar or dal center da la citad il traffic or ed en il Scanvetg che s'augmenta er vinavant, ed ins stuess renovar la colliaziun stradala existenta en la citad tranter l'Obertor e Maladers, tolerond intervenziuns massivas en la structura urbana (enturn la sedia episcopala ch'è degna da vegnir protegida). Ed er l'entir program d'aglomeraziun, en spezial las mesiras per meglierar la situaziun da traffic en il center da Cuira, avess in effect bler pli pitschen."
Sin basa da questa situaziun da partenza areguard il rapport d'examinaziun da la confederaziun davart il project d'aglomeraziun "Cuira" ed areguard la prioritad incontestada en il project chantunal d'aglomeraziun sa tschenta la dumonda, co ch'il project da la colliaziun laterala en il Scanvetg cun la punt auta da son Luzi a Cuira po tuttina vegnir realisà entaifer il proxim temp. A medem temp stoi er vegnir prendì enconuschientscha dal fatg ch'in project da la prioritad C n'è – sin basa dals programs da spargn da la confederaziun – betg realisabel entaifer il proxim temp.
Ord quest puntg da vista vegn la regenza envidada da surpigliar la responsabladad per la finanziaziun dal project "punt auta da son Luzi" e d'accelerar sia realisaziun.
Cuira, ils 21 d'avrigl 2010
Casty, Hartmann (Cuira), Portner, Berther (Mustér), Bischoff, Bleiker, Brandenburger, Buchli, Butzerin, Campell, Castel¬berg-Fleischhauer, Casutt, Caviezel-Sutter (Tusaun), Christoffel-Casty, Claus, Conrad, Dudli, Federspiel, Felix, Feltscher, Geisseler, Hardegger, Hasler, Jäger, Jeker, Jenny, Kessler, Koch, Kollegger, Krättli-Lori, Kunz (Cuira), Mani-Heldstab, Märchy-Michel (Malans), Marti, Menge, Mengotti, Meyer-Grass (Claustra Vitg), Michel, Möhr, Nigg, Parolini, Parpan, Pedrini, Peer, Plozza, Stiffler, Stoffel, Thomann, Trepp, Tscholl, Vetsch (Claustra Vitg), Vetsch (Pragg-Jenaz), Bühler (Valendau), Clalüna, Furrer-Cabalzar, Kunz (Fläsch), Largiadèr, Niederberger, Schädler
Resposta da la regenza
Sa basond sin il studi da realisabladad ch'è vegnì preschentà l'avust 2006, ha l'uffizi da construcziun bassa dal Grischun elavurà il project d'exposiziun per ina colliaziun da la via dal Scanvetg cun la via dal Güglia. Il project è stà exponì publicamain la stad 2008. Il preventiv dals custs importa var 60 milliuns francs tenor il project d'exposiziun. Durant l'exposiziun èn entradas differentas posiziuns e protestas cunter il project. Singulas da quellas han effectuà retschertgas e scleriments supplementars.
Durant l'entira elavuraziun dal project ed a chaschun da tut las discussiuns en il cussegl grond ha la regenza adina punctuà ch'il project saja mo realisabel cun in sustegn finanzial considerabel da vart da la confederaziun (cf. er il program da construcziun da vias 2009-2012, missiva carnet nr. 16/2007-2008, p. 921).
Quest project è vegnì inoltrà la fin da l'onn 2007 a la confederaziun sco part dal project d'aglomeraziun Cuira. Suenter in'examinaziun cumplessiva ha la confederaziun midà il project da la colliaziun laterala en il Scanvetg – per l'emprima fasa da realisaziun 2011-2014 – dal stgalim giavischà A giu sin il stgalim C. Quai cun l'argumentaziun che la relaziun dals custs e dal niz saja insuffizienta ord vista da la confederaziun. I saja dentant pussaivel da reinoltrar il project per la segunda fasa da realisaziun 2015-2018.
Realisticamain n'èn pia las premissas finanzialas per ina realisaziun betg ademplidas per il mument ord vista da la regenza. Sin basa dals meds finanzials che stattan a disposiziun per la construcziun da vias chantunalas fissi pussaivel da construir la nova colliaziun laterala senza sustegn federal mo sin donn e cust d'auters projects da vias che vegnan gia realisads u ch'èn projectads.
Perquai na vesa la regenza actualmain naginas pussaivladads da realisar il project senza meds finanzials dal program d'aglomeraziun. Ella è dentant pronta da decider anc durant l'onn current davart las protestas e davart l'approvaziun dal project, suenter che tut ils scleriments supplementars èn avant maun. En il rom da la segunda fasa da realisaziun vegn la regenza ultra da quai a s'engaschar tar la confederaziun ch'il project vegnia giuditgà da nov e, sche pussaivel, puspè classifitgà en il stgalim da prioritads A. En spezial vegn la regenza a s'engaschar che er ils basegns d'aglomeraziuns pli pitschnas vegnian resguardads a chaschun da la deliberaziun da la proxima transcha – sco previs en la lescha. Quai che sto avair per consequenza che la metodica d'examinaziun resp. che la relevanza dals custs e dal niz vegnia repassada.
Cun la restricziun che la regenza n'è betg pronta da garantir la finanziaziun ord agens meds finanzials ordaifer il program da construcziun da vias current, è ella pronta d'acceptar l'incumbensa.
7 da fanadur 2010