En il quint statal dal chantun Grischun, sut la posiziun 2031 resp. sut las posiziuns 8101 fin 9000, figureschan mintgamai l'effectiv, ils retgavs e las utilisaziuns da las differentas fundaziuns che vegnan administradas dal chantun. Ultra da quai èn resumads, sut la posiziun 9000, diversas fundaziuns e divers fonds pli pitschens che han uschenumnads intents spezials.
Ultra dals intents da la fundaziun che n'èn tar singulas fundaziuns betg pli dal tuttafatg actuals ed er ultra da tschertas cruschadas tematicas, pon ins constatar tar pliras fundaziuns ch'ellas han relativamain pitschens retgavs ed utilisaziuns modestas.
Schebain ch'il dretg da fundaziuns metta autas barrieras per midar l'intent u per transferir ina fundaziun en in'autra, stuessi vegnir examinà, sch'igl è pussaivel da fusiunar secturs parzials u sch'i po vegnir applitgà l'instrument d'ina fundaziun collectiva, sco ch'ella è vegnida realisada avant intgins onns da la citad da Cuira.
Nus incumbensain perquai la regenza d'examinar, sche intginas da questas fundaziuns ubain intgins da quests fonds pon vegnir fusiunads u eventualmain transferids en ina fundaziun collectiva.
Cuira, ils 26 d'avust 2010
Pfenninger, Marti, Aebli, Baselgia-Brunner, Bezzola (Zernez), Brandenburger, Buchli, Burkhardt, Candinas, Casutt, Clavadetscher, Davaz, Dermont, Felix, Frigg-Walt, Furrer-Cabalzar, Gartmann-Albin, Gasser, Geisseler, Hartmann (Champfèr), Jaag, Jenny, Kappeler, Kasper, Kleis-Kümin, Koch (Landquart), Kollegger (Malix), Krättli-Lori, Locher Benguerel, Meyer-Grass, Michael (Donat), Michael (Castasegna), Michel (Tavau Monstein), Müller, Nick, Nigg, Noi-Togni, Papa, Pedrini, Perl, Peyer, Pult, Rosa, Stiffler (Tavau Plaz), Thöny, Trepp, Troncana-Sauer, Vetsch (Pragg-Jenaz), Deplazes, Hensel, Michel (Igis), Monigatti
Resposta da la regenza
1. Tenor l'art. 16 da la lescha davart las finanzas e davart la surveglianza da las finanzas dal chantun Grischun (LFSF; DG 710.100) è la regenza cumpetenta per prender encunter – en num dal chantun – legats e fundaziuns dependentas da terzas persunas. Sche lur intent croda u na po betg pli vegnir persequità adequatamain, fusiunescha la regenza ils legats u las fundaziuns dependentas cun auters legats u cun autras fundaziuns dependentas u als dissolva. Ils legats e las fundaziuns dependentas vegnan manads entaifer il quint da facultad. Ils quints dals legats, da las fundaziuns e dals fonds che figureschan sin la posiziun 2031 da la bilantscha vegnan cumprovads en l'agiunta tar il quint dal chantun (art. 37 al. 2 lit. 3 LFSF, cf. il quint dal chantun 2009, p. 353ss.). En cas da las fundaziuns, dals legats e dals fonds meziunads sa tracti da fundaziuns dependentas. In'excepziun è la "fundaziun da dr. med Albert Coray". Quella vegn excorporada dal quint dal chantun per la fin da l'onn 2010.
2. Fundaziuns dependentas èn frequentas en la pratica. Ellas sa differenzieschan da las fundaziuns da dretg privat tras la mancanza d'ina atgna persunalitad giuridica. Il cudesch civil svizzer CCS na cuntegna naginas reglas per fundaziuns dependentas. Decisiv è mintgamai il dretg che furma la basa per l'act giuridic respectiv, sin il qual l'assegnaziun da facultad sa basa (dretg da donaziuns e dretg d'ierta). Sche quests secturs da dretg na cuntegnan dentant naginas normas per schliar problems, po vegnir applitgà analogamain il dretg da fundaziuns (CCS). I po vegnir examinà, sch'igl è pussaivel da fusiunar ils legats ed ils fonds existents.
3. Las utilisaziuns per part modestas ultra dals intents limitads resultan eventualmain er perquai ch'ils meds finanzials existents n'èn betg enconuschents. Igl è chaussa dals departaments e dals uffizis cumpetents da far dapli lavur da scleriment en quest reguard e d'infurmar destinaturas e destinaturs potenzials davart las pussaivladads. En il center stat en quest connex l'utilisaziun confurma a l'intent e betg l'augment dals meds finanzials.
4. En cas da fundaziuns independentas pitschnas èsi oz la pratica che la surveglianza da fundaziuns sustegna – sin dumonda – ils organs da la fundaziun cun als cussegliar, sche la fundaziun vul fusiunar cun in'autra fundaziun u sche – en vista a la dissoluziun da la fundaziun – la facultad restanta da la fundaziun duai vegnir appurtada silsuenter en ina fundaziun collectiva. En cas d'ina fundaziun collectiva èsi pussaivel da deditgar sin ina moda e maniera simpla tschertas facultads ad in intent specific. La furma da la fundaziun collectiva permetta da garantir er en cas da facultads da fundaziun pitschnas che l'interess caritativ u d'utilitad publica giavischà po vegnir sustegnì cun cleras finamiras.
5. In exempel per ina fundaziun collectiva è la fundaziun Succursus a Son Gagl. Ella sa cumpona da plirs singuls fonds. Tgi che vul dar ina part da sia facultad per in tschert intent caritativ u d'utilitad publica, po stabilir sco confundatura u sco confundatur in agen fond sut il tetg da la fundaziun. La confundatura u il confundatur fixescha sezza u sez il num e l'intent dal fond correspundent e po – sin giavisch – er cundecider tar l'utilisaziun dals meds dal fond ubain engaschar ina direcziun dal fond. La fundaziun controlla ed administrescha la facultad dals singuls fonds ensemen cun las facultads dals ulteriurs fonds. Quai permetta d'administrar ils fonds ch'èn liads ad in intent cun pitschens custs ed en moda efficazia.
6. Tenor la valitaziun da la surveglianza da fundaziuns è il potenzial per ina fundaziun collectiva grischuna avant maun. Perquai vul la regenza prender per mauns e stabilir ina tala fundaziun collectiva cun sedia en il Grischun.
La regenza è pronta d'acceptar l'incumbensa.
29 d'october 2010