In studi naziunal davart il cumportament sportiv da la populaziun grischuna ha mussà che quatter tschintgavels da la populaziun residenta en la vegliadetgna da 15 fin 74 onns fan mintgatant sport e che dapli che la mesadad da la populaziun grischuna fa schizunt pliras giadas per emna sport. Il studi ha attestà a las Grischunas ed als Grischuns ina sportivadad ch'è cleramain sur la media. Il sport en la "arena da sport la pli bella dal mund", en la natira grischuna, è er in factur economic e local. Ina part essenziala da la svieuta da 5.5 milliardas francs en il turissem grischun stat directamain u indirectamain en connex cun l'exercizi d'ina disciplina da sport, per gronda part probablamain cun in disciplina da sport d'enviern. Il Grischun po pia vegnir designà sco "local da fitness il pli multifar ed attractiv da la Svizra".
L'impurtanza sociala dal sport en il Grischun pretenda in concept chantunal da sport. In tal concept da sport duai definir en emprima lingia, nua che la promoziun dal sport è ina incumbensa dal stadi e nua ina incumbensa dal sport organisà tenor il dretg privat, dentant er fixar, co che las coordinaziuns han lieu. Ultra dal sport da scola e dal sport en federaziuns ed en uniuns duain vegnir resguardads er aspects dal sport individual. In concept grischun da sport sto la finala avair la finamira d'augmentar vinavant la quota da la populaziun ch'è sportivamain activa, e quai en tut las categorias da vegliadetgna ed en tut las gruppas da la populaziun. En quest reguard duai il concept er cuntegnair ils aspects da la promoziun dal sport.
Cuira, ils 27 d'avust 2010
Rathgeb, Cavegn, Perl, Aebli, Albertin, Barandun, Berther (Sedrun), Bezzola (Zernez), Blumenthal, Bucher-Brini, Burkhardt, Caduff, Caluori, Candinas, Casanova-Maron, Casty, Casutt-Derungs, Conrad, Davaz, Della Vedova, Dermont, Dosch, Engler, Florin-Caluori, Fontana, Furrer-Cabalzar, Gasser, Geisseler, Giacomelli, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jeker, Jenny, Joos, Kappeler, Kasper, Koch (Tumein), Koch (Landquart), Kunz (Fläsch), Locher Benguerel, Marti, Meyer-Grass, Michael (Donat), Michel (Tavau Monstein), Montalta, Müller, Nick, Niggli (Grüsch), Noi-Togni, Papa, Parolini, Pedrini, Pfäffli, Righetti, Sax, Steck-Rauch, Stiffler (Tavau Plaz), Thöny, Tomaschett-Berther (Trun), Troncana-Sauer, Valär, Waidacher, Zanetti, Zweifel-Disch, Deplazes, Michel (Igis), Monigatti
Resposta da la regenza
Er la regenza è impressiunada ed intgantada dal resultat excellent che noss chantun po preschentar en il studi "Sport en il chantun Grischun". Quest studi è ina part da la retschertga naziunala "Sport Svizra 2008". En praticamain tut ils secturs ch'èn vegnids analisads da questa vasta retschertga cuntanschan nossas abitantas e noss abitants en la vegliadetgna tranter 15 e 74 onns valurs excellentas en cumparegliaziun cun la media svizra.
Ils motivs per il cumportament sportiv exemplaric da las abitantas e dals abitants dal Grischun vesa la regenza d'ina vart – sco menziunà er en l'incumbensa – en l'impurtanza dal sport per l'entira societad dal chantun, da l'autra vart dentant er en las stentas cumplessivas ed intensivas, sin las qualas la promoziun grischuna dal sport po sa basar dapi decennis.
La regenza ha in grond interess che la valur centrala dal sport per il chantun da muntogna Grischun vegnia mantegnida e consolidada. Als entretschaments socials dal sport stoi perquai vegnir dà gronda attenziun er en l'avegnir en tut ils secturs pertutgads, sco il turissem, l'economia da construcziun, il mastergn, la sanadad e.u.v.
En il senn da l'incumbensa qua avant maun duai il concept da sport pretendì sa concentrar sin la basa dal fenomen "sport", ch'è d'ina impurtanza vitala per il chantun Grischun. Uschia duai il concept tranter auter definir, nua che la promoziun dal sport è ina incumbensa dal stadi e nua ch'ella è ina incumbensa dal sport organisà tenor il dretg privat. Ultra da quai duain vegnir illustrads ils differents aspects dal sport da scola, dal sport en federaziuns, dal sport en uniuns e dal sport individual e vegnir mussadas pussaivladads da coordinaziun correspundentas. La finamira principala declerada dal concept da sport pretendì è quella d'augmentar vinavant la quota da la populaziun ch'è fa activamain sport, e quai en tut las categorias da vegliadetgna ed en tut las gruppas da la populaziun.
En vista a questa finamira propona la regenza da betg designar il concept pretendì en l'incumbensa sco "concept da sport", mabain sco "concept per la promoziun dal sport". Resguardond ils numerus elements da la promoziun dal sport ch'existan gia, ha il concept per la promoziun dal sport cunzunt l'incumbensa da preschentar l'existent e – sche necessari – da coordinar quai cun la situaziun actuala e da cumplettar quella. En quest connex duai vegnir resguardà ch'i na vegnan betg midadas parts dal concept ch'existan dapi onns, ch'èn sa cumprovadas en la pratica e che han manà il chantun Grischun a la plazza excellenta en cumparegliaziun cun la media svizra.
En il senn da questas explicaziuns è la regenza pronta d'acceptar l'incumbensa d'elavurar in concept grischun per la promoziun dal sport.
20 d'october 2010