En l'art. 4 da la lescha davart la promoziun da la tgira d'uffants cumplementara a la famiglia en il chantun Grischun dals 18 da matg 2003 (DG 548.300) vegn la cumpetenza da las vischnancas reglada sco suonda:
"En collavuraziun cun las purschidras e cun ils purschiders renconuschids defineschan las vischnancas il basegn da purschidas da la tgira d'uffants cumplementara a la famiglia."
La federaziun spezialisada per la tgira d'uffants dal Grischun coordinescha l'eruida dal basegn tar las purschidras e tar ils purschiders renconuschids. L'uffizi dal servetsch social chantunal suttametta la planisaziun dal basegn, che resulta qua tras per l'onn suandant, a las vischnancas per las laschar renconuscher quella. Dals uffizis e dals posts spezialisads chantunals involvids vegn l'art. 4 interpretà en differenta moda, uschia ch'igl èn er resultadas differentas applicaziuns tar las vischnancas. Questa circumstanza dastgass avair per consequenza ch'in scleriment davant dretgira vegn prendì en mira il proxim temp en questa dumonda.
Interpretaziun 1: Las vischnancas ston renconuscher cumplainamain il basegn annunzià per l'onn suandant, gist uschia sco il basegn annunzià posteriuramain per l'onn current.
Interpretaziun 2: Las vischnancas ston renconuscher cumplainamain il basegn annunzià per l'onn suandant. Ellas èn libras da renconuscher cumplainamain il basegn annunzià posteriuramain per l'onn current ubain da refusar parzialmain u cumplainamain la renconuschientscha dal basegn annunzià posteriuramain.
Interpretaziun 3: Las vischnancas èn libras da renconuscher cumplainamain il basegn annunzià ubain da refusar parzialmain u cumplainamain la renconuschientscha dal basegn annunzià.
Per che las vischnancas possian trair a niz in eventual spazi d'agir, ston ellas ultra da quai survegnir il dretg da dumandar las purschidras ed ils purschiders infurmaziuns davart las persunas cun la pussanza dals geniturs, sco lur entradas e lur facultad u lur grad d'occupaziun.
Da las interpretaziuns – che sa cuntradin dal tuttafatg u per part – resulta ina malsegirezza giuridica davart il spazi d'agir da las vischnancas, e quai per ellas sezzas, per las purschidras e per ils purschiders da la tgira d'uffants cumplementara a la famiglia sco er per las persunas cun la pussanza dals geniturs che fan diever da questas purschidas.
Per quest motiv supplitgeschan las sutsegnadras ed ils sutsegnaders la regenza da reveder la lescha davart la promoziun da la tgira d'uffants cumplementara a la famiglia cun la finamira da reglar cleramain la libertad d'agir da las vischnancas areguard la renconuschientscha da la planisaziun dal basegn.
Cuira, ils 19 d'october 2010
Casanova-Maron, Kleis-Kümin, Parolini, Bondolfi, Caluori, Claus, Conrad, Engler, Gunzinger, Heiz, Hitz-Rusch, Holzinger-Loretz, Kappeler, Kollegger (Cuira), Kunz (Fläsch), Kunz (Cuira), Lorez-Meuli, Märchy-Caduff, Marti, Michael (Donat), Michel, Nick, Niederer, Niggli-Mathis (Grüsch), Papa, Pedrini, Perl, Pfäffli, Rathgeb, Righetti, Steck-Rauch, Tenchio, Tomaschett-Berther (Trun), Troncana-Sauer
Resposta da la regenza
La lescha davart la promoziun da la tgira d'uffants cumplementara a la famiglia en il chantun Grischun (lescha; DG 548.300) regla, co che las vischnancas ed il chantun ston sa participar a la finanziaziun da purschidas per uffants da la vegliadetgna prescolara e per uffants che van a scola ordaifer las uras d'instrucziun obligatoricas. A favur da la promoziun da la tgira d'uffants cumplementara a la famiglia en il senn d'ina politica moderna en quai che reguarda la famiglia, la societad ed il champ social, cun resguardar las pretensiuns da l'economia e dal martgà da lavur (politica da famiglia), pledan en emprima lingia ils suandants motivs:
1. Il dumber d'uffants ch'èn surlaschads a sasezs e ch'èn tras quai periclitads en lur pussaivladads da svilup vegn reducì, e per uffants che vivan en relaziuns difficilas èn contacts socials supplementars spezialmain impurtants.
2. Meglra garanzia da l'existenza per famiglias e damain sustegn public.
3. Il martgà da lavur en Svizra dovra pli e pli il know-how e l'engaschament professiunal da las dunnas.
En il rapport grischun da famiglia (missiva da la regenza al cussegl grond, carnet nr. 15/2002-2003) è danovamain vegnida confermada la finamira che la cumpatibilitad tranter famiglia e professiun stoppia vegnir meglierada.
Tenor l'art. 4 da la lescha defineschan las vischnancas il basegn da purschidas da la tgira d'uffants cumplementara a la famiglia, e quai en collavuraziun cun las purschidras e cun ils purschiders renconuschids. Fin ils 31 da matg da l'onn precedent inoltreschan las vischnancas ils resultats da la planisaziun dal basegn per l'onn suandant a l'uffizi chantunal dal servetsch social (art. 3 da las disposiziuns executivas). Quai permetta da budgetar la cofinanziaziun en moda ordinaria, ma tras annunzias posteriuras d'in basegn daventi pli difficil da planisar la cofinanziaziun.
Da princip èsi da quintar a vista mesauna cun in ulteriur augment dal basegn. La structura da vegliadetgna dals uffants tgirads na lascha betg far quint cun extradas e la finanziaziun da partenza da la confederaziun è vegnida prolungada fin la fin da l'onn 2015. Annunzias posteriuras resultan principalmain tras ina mobilitad professiunala da famiglias giuvnas sur ils cunfins communals or, tras midadas da chasa d'ina vischnanca en in'autra entaifer il chantun, tras persunas d'auters chantuns che sa domicilieschan da nov en il Grischun e tras la planisaziun da famiglia che ha lieu en la sfera privata. Il basegn sto vegnir definì sin basa da questas annunzias en il senn da la politica da famiglia moderna concludida dal cussegl grond.
En quai che reguarda la concepziun e la finanziaziun è il cussegl grond sa decidì per ina contribuziun da basa dal chantun e da las vischnancas, senza resguardar la capacitad economica dals geniturs. Consequentamain na dastgan decisiuns concernent la definiziun dal basegn betg sa basar sin l'activitad da gudogn u sin la facultad da las persunas cun la pussanza dals geniturs. Tenor las indicaziuns da l'incumbensà chantunal per la protecziun da datas na dastgan il chantun e las vischnancas betg sa procurar infurmaziuns che s'orienteschan als subjects, sco las entradas, la facultad u il grad d'occupaziun da las persunas cun la pussanza dals geniturs. Sch'ina vischnanca vul diriger il basegn ultra da la dumonda cumprovada, èsi sia chaussa da definir criteris adattads u da refusar dumondas per ulteriuras plazzas.
La regenza renconuscha las sfidas ch'existan actualmain per las vischnancas e per il chantun areguard la planisaziun da las contribuziuns per la cofinanziaziun da las purschidas. Ella persequitescha vinavant las finamiras da la politica moderna concludida dal cussegl grond en quai che reguarda la famiglia, la societad ed il champ social, cun resguardar las pretensiuns da l'economia e dal martgà da lavur. Ord vista da la regenza n'èsi betg cunvegnent da reveder la lescha cun l'intent da cofinanziar las purschidas per meglierar la segirezza da planisaziun. Per ils motivs preschentads è la regenza cunter ina revisiun da la lescha davart la promoziun da la tgira d'uffants cumplementara a la famiglia en il chantun Grischun e propona perquai al cussegl grond da refusar l'incumbensa qua avant maun.
20 da december 2010