L'ordinaziun davart las cundiziuns d'engaschament per ils schefmedis ed ils medis directurs dals ospitals cun dretg da contribuziuns en il chantun Grischun sa basa sin l'art. 27 al. 1 da la lescha per promover la tgira da persunas malsaunas (LTM). Questa disposiziun dat la pussaivladad a la regenza da relaschar sche necessari «prescripziuns ... davart las cundiziuns d'engaschament per il persunal da las instituziuns cun dretg da survegnir contribuziuns».
L'art. 27 al. 2 LTM sa cloma percunter: «Las instituziuns cun dretg da survegnir contribuziuns èn obligadas da manar il manaschi en moda spargnusa e confurm a lur incumbensas respectivamain a lur tips d'ospital, e quai sin basa d'utilitad publica.»
Las suandantas ponderaziuns pledan per in'aboliziun da l'ordinaziun davart las cundiziuns d'engaschament per ils schefmedis ed ils medis directurs:
• Tenor l'art. 27 al. 2 LTM, che vegn cità qua survart, ston las instituziuns manar il manaschi confurm a lur tips d'ospital. Quai pertutga er las cundiziuns d'engaschament.
• L'ordinaziun fixescha definitivamain ina part considerabla dals custs da persunal. Tras l'introducziun dals custs pro cas a partir da l'onn 2012 dovri dentant ina concepziun individuala.
• L'ordinaziun existenta impedescha in engaschament en models innovativs, sco p.ex models da participaziun vi da la contribuziun da garanzia realisada u vi dal gudogn realisà.
• L'introducziun d'in concept da titels, p.ex. cun directurs medicinals, vegn engrevgiada, perquai che l'ordinaziun na prevesa betg quai.
• En general fraina l'ordinaziun vertenta la gestiun, l'innovaziun e l'adattaziun a las relaziuns actualas dal martgà.
Dischavantatgs gravants n'èn betg vesaivels en cas d'ina aboliziun da l'ordinaziun. Perquai vegn la regenza incumbensada d'examinar l'aboliziun da l'ordinaziun davart las cundiziuns d'engaschament per ils schefmedis ed ils medis directurs dals ospitals cun dretg da contribuziuns en il chantun Grischun e da far ina proposta u in rapport al cussegl grond.
Cuira, ils 19 d'october 2010
Nick, Hardegger, Geisseler, Barandun, Bezzola (Samedan), Bezzola (Zernez), Blumenthal, Bondolfi, Buchli-Mannhart, Caluori, Campell, Casanova-Maron, Casty, Casutt, Claus, Davaz, Della Vedova, Dudli, Engler, Felix, Fontana, Furrer-Cabalzar, Giacomelli, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jenny, Kappeler, Krättli-Lori, Kunz (Fläsch), Kunz (Cuira), Lorez-Meuli, Mani-Heldstab, Meyer-Grass, Michael (Castasegna), Michel, Niggli (Samedan), Niggli-Mathis (Grüsch), Papa, Parolini, Parpan, Pedrini, Pfäffli, Rathgeb, Rosa, Steck-Rauch, Stiffler (Tavau Plaz), Stiffler (Cuira), Tenchio, Troncana-Sauer, Vetsch (Claustra Vitg), Vetsch (Pragg-Jenaz), Waidacher, Wieland, Zweifel-Disch, Candrian, Patt
Resposta da la regenza
L'ordinaziun davart las cundiziuns d'engaschament per ils schefmedis ed ils me-dis directurs dals ospitals cun dretg da contribuziuns en il chantun Grischun (DG 506.700) è vegnida relaschada da la regenza ils 6 da settember 1994 sin basa da l'art. 27 da la lescha per promover la tgira da persunas malsaunas. Tenor questa disposiziun po la regenza tranter auter relaschar prescripziuns davart las cundiziuns d'engaschament per il persunal da las instituziuns subvenziunablas.
Suenter l'introducziun da la nova finanziaziun chantunala dals ospitals e suenter la midada da la finanziaziun da deficit a la finanziaziun dals ospitals tras il chantun tenor las prestaziuns per il 1. da schaner 2005 sa tschenta la dumonda, sche l'ordinaziun duess vegnir abolida sut l'aspect da la reducziun da las prescripziuns operativas dal chantun als ospitals subvenziunabels. Sin dumonda è la federaziun grischuna "chasas ed ospitals" s'exprimida en la brev dals 19 da fanadur 2006 cunter in'aboliziun da l'ordinaziun. Questa tenuta è vegnida argumentada cun il fatg ch'i valian – tras l'ordinaziun – cundiziuns d'engaschament unitaras per tut ils ospitals e che l'in¬demnisaziun da las medias e dals medis saja reglada cleramain per las differentas activitads. Sin giavisch da la federaziun "chasas ed ospitals" è l'ordinaziun pia restada en vigur.
Sin ina nova dumonda è la federaziun grischuna "chasas ed ospitals" s'exprimida en la brev dals 2 da december 2010 per in'aboliziun da l'ordinaziun. Quai en enclegientscha cun la conferenza da las medias e dals medis d'ospital. Questa tenuta vegn argumentada cun il fatg ch'i dovria a partir da l'onn 2012 (cur che las disposiziuns revedidas davart la finanziaziun dals ospitals en la lescha federala davart l'assicuranza da malsauns [LAMal] entran en vigur) dapli libertads d'interprendider per manar ils ospitals, ch'i duessan esser pussaivels models d'engaschament e concepts da titels innovativs e ch'ils ospitals veglian far frunt a las sfidas futuras d'interprendider. Empè da l'ordinaziun planiseschia la federaziun d'elavurar in contract da model per engaschar schefmedias e schefmedis sco er medias directivas e medis directivs. Per che ella haja temp avunda per far quai, propona la federaziun grischuna "chasas ed ospitals" d'abolir l'ordinaziun vertenta pir per il 1. da schaner 2012.
Tegnend quint da la nova tenuta da la federaziun grischuna "chasas ed ospitals" è la regenza pronta d'abolir l'ordinaziun davart las cundiziuns d'engaschament per ils schefmedis ed ils medis directurs dals ospitals cun dretg da contribuziuns en il chantun Grischun per il 1. da schaner 2012. Ina proposta u in rapport per mauns dal cussegl grond – sco quai ch'i vegn pretendì en l'incumbensa – croda, perquai che l'aboliziun da l'ordinaziun tutga al champ da cumpetenza da la regenza. En quest senn vegn l'incumbensa acceptada.
12 da schaner 2011