Da la decisiun dal cussegl grond da betg pajar ina contribuziun per sviluppar vinavant Domat sco lieu per l'elavuraziun da laina e per realisar sco previs in implant da pellets resulta eventualmain il concurs da la resgia gronda. Pervia da la gronda impurtanza da l'economia forestala per noss chantun e sin basa da la strategia sviluppada communablamain ils ultims onns cun il project "Martgà da laina radunda en il Grischun" cun l'intent da realisar offensivas per trair a niz il guaud, da sustegnair il martgà da laina sco er d'augmentar l'effizienza tar la cultivaziun dal guaud sa tschentan las suandantas dumondas:
1. Co giuditgescha la regenza las perspectivas futuras per l'economia forestala dal Grischun cun ed eventualmain senza la resgia gronda (en il guaud da protecziun ed en il guaud d'utilisaziun)?
2. Co vul la regenza realisar la strategia che resulta dal project "Martgà da laina radunda en il Grischun" e ch'è vegnida elavurada communablamain da las acturas e dals acturs participads da l'economia forestala, cun ed eventualmain senza la resgia gronda?
3. Cun tge instruments e cun tge mesiras è la regenza pronta da sustegnair las proprietarias ed ils proprietaris da guaud da dumagnar las cundiziuns pli difficilas che resultan sin il martgà da laina futur, sche la resgia gronda serra, per garantir ina racolta da laina uschè rentabla sco pussaivel?
Cuira, ils 8 da december 2010
Sax, Buchli-Mannhart, Kleis-Kümin, Albertin, Berther (Camischolas), Bezzola (Samedan), Bezzola (Zernez), Blumenthal, Caduff, Caluori, Campell, Casutt, Casutt-Derungs, Cavegn, Clalüna, Conrad, Darms-Landolt, Dosch, Engler, Florin-Caluori, Foffa, Furrer-Cabalzar, Gartmann-Albin, Gasser, Geisseler, Giacomelli, Grass, Hartmann (Champfèr), Jaag, Jenny, Joos, Kollegger (Malix), Locher Benguerel, Märchy-Caduff, Michael (Donat), Michel, Müller (Tavau Plaz), Niggli (Samedan), Niggli-Mathis (Grüsch), Noi-Togni, Papa, Parpan, Pedrini, Peyer, Pfenninger, Stiffler (Tavau Plaz), Tomaschett (Breil), Tomaschett-Berther (Trun), Trepp, Valär, Zanetti, Cortesi, Müller (Haldenstein), Nicolay, Patt
Resposta da la regenza
1. Immediatamain suenter la serrada da l'ovra a Domat è il retgav che resulta da la vendita da laina radunda sa reducì per almain 25.– francs per m³. Quai correspunda ad ina reducziun da 20 fin 30 pertschient per m³. Ils motivs per quai èn d'ina vart la reducziun effectiva dal pretsch, da l'autra vart er ils custs supplementars per distanzas da transport pli lungas. Ina prognosa dal pretsch è fitg difficila – a vista mesauna pudess la dumonda puspè s'augmentar ed uschia avair effects positivs per il pretsch.
Il fatg è quel che l'avantatg economic d'ina resgia gronda en la vischinanza è ì a perder. La buna quantitad da l'utilisaziun da laina dals ultims onns na po betg vegnir mantegnida senza la dumonda d'in cumprader a l'engrossa. Perquai è l'economia forestala dal Grischun puspè dependenta pli fitg da contribuziuns dal maun public. La reducziun dal retgav da laina suletta chaschuna en il quint da las subvenziuns per la tgira dal guaud da l'uffizi forestal dal Grischun custs supplementars per l'onn 2011 da 2.2 milliuns francs, perquai ch'ils deficits pli gronds tar la tgira dal guaud ston vegnir gulivads tras il maun public.
Ultra da quai ston puspè vegnir diminuidas las surcapacitads en ils manaschis da las interpresas forestalas dal Grischun. Spetgads vegnan gronds problems da vendita er en connex cun il manaschament d'utilisaziuns sfurzadas (en cas da donns da guaud tras naiv, tras vent, tras il bau-scorsa e.u.v). L'economia forestala dal Grischun ha pers sia efficacitad e sia effizienza tras la perdita d'in cumprader a l'engrossa local.
2. Las finamiras restan da princip las medemas, cun u senza resgia gronda. Il project "Martgà da laina radunda en il Grischun" vul introducir mesiras che reduceschan ils custs e che auzan il gudogn da la cultivaziun dal guaud. Ultra da quai duain questas mesiras augmentar l'effizienza, optimond las structuras, en spezial tar ils manaschis forestals da las vischnancas.
La motivaziun d'utilisar il guaud è sa sminuida considerablamain tar ils manaschis forestals, damai ch'i manca la resgia gronda al lieu. Perquai ston ils impuls finanzials vegnir augmentads. La quantitad d'utilisaziun annuala duai – sche pussaivel – vegnir mantegnida al nivel da 300'000 m³. Quai n'è betg mo raschunaivel per motivs da la necessitad selviculturala, en spezial per mantegnair il guaud da protecziun intact ed efficazi, mabain è er da gronda impurtanza per garantir las capacitads dals manaschis forestals publics e da las interpresas forestalas. Sche las capacitads vegnan reducidas fermamain entaifer in curt temp, vegni puspè lavurà en moda pli chara e cun maschinas pauc effizientas. Tras quai s'augmentan ils pretschs per la tgira dal guaud.
3. Igl è previs d'augmentar las pauschalas dal retgav. La reducziun dals retgavs da laina duai vegnir cumpensada cun circa 2.2 milliuns francs. Ultra da quai duai la promoziun sistematica da las cranas a cabel a lunga distanza (ca. 1.3 milliuns francs) gidar ch'ils contracts ch'èn gia vegnids fatgs per la vendita da laina en pe possian vegnir ademplids e che las capacitads modernas ch'èn vegnidas stgaffidas en las interpresas forestalas ed en ils manaschis forestals publics na stoppian betg vegnir reducidas memia fitg. Questas mesiras èn limitadas ad in onn.
Ulteriuras mesiras duain resultar dal project "Martgà da laina radunda en il Grischun", numnadamain augmentar l'effizienza (optimar l'avertura, promover la planisaziun d'utilisaziun regiunala), sustegnair ils manaschis forestals en connex cun la communicaziun, cun la scolaziun e cun la furmaziun supplementara (PR, cussegliaziun dal manaschi, purschidas da la furmaziun supplementara) sco er meglierar las cundiziuns generalas en collavuraziun cun auters posts da servetsch (structuras communalas effizientas).
23 da favrer 2011