L'ultim rapport cumplessiv da la regenza davart la situaziun da la politica d'electricitad e davart la strategia dal chantun Grischun è passa 10 onns vegl (missiva da la regenza al cussegl grond, carnet nr. 8/1999-2000, "Rapport davart las consequenzas da la liberalisaziun dal martgà d'electricitad per il chantun Grischun"). La strategia ch'è vegnida formulada quella giada ha senza dubi gì success.
Dapi lura èn sa midads ferm tant l'ambient sco er las sfidas futuras, tranter auter:
• l'entrada en vigur da la lescha federala davart il provediment d'electricitad il 1. da schaner 2008 e da la lescha davart il provediment d'electricitad dal chantun Grischun il 1. da settember 2009 cun in augment tendenzial dals pretschs d'electricitad;
• il pegiurament da la problematica da CO2, grond progress da las energias regenerablas, en spezial da la forza idraulica;
• il potenzial sin il martgà d'electricitad er per il Grischun, cun Repower sco actur signifitgant en quest sectur;
• la fin la fin da l'onn 2012 integraziun da las raits da transmissiun en la societad naziunala da rait swissgrid.
Ultra da quai èn ils mandats da la regenza, dals uffizis responsabels e dal cussegl grond vegnids occupads quasi dal tuttafatg cun novas persunas ils ultims onns. I para pia d'esser inditgà d'examinar puspè la situaziun, las finamiras e la strategia e da las adattar eventualmain a las enconuschientschas actualas.
Las sutsegnadras ed ils sutsegnaders supplitgeschan la regenza da preschentar al cussegl grond uschè svelt sco pussaivel in rapport cumplessiv davart la situaziun actuala e previsibla dals fatgs da l'energia electrica sco er davart la posiziun dal chantun Grischun en quest sectur fitg impurtant per l'economia publica e da delucidar en quest rapport actualisà, sch'igl è necessari d'adattar punctualmain las finamiras strategicas sco er sch'igl è necessari da prender ulteriuras resp. autras mesiras.
Cuira, ils 15 da favrer 2011
Heiz, Augustin, Jeker, Barandun, Berther (Camischolas), Bezzola (Samedan), Bezzola (Zernez), Blumenthal, Bondolfi, Brandenburger, Buchli-Mannhart, Burkhardt, Campell, Candinas, Casty, Casutt, Casutt-Derungs, Cavegn, Clalüna, Claus, Clavadetscher, Conrad, Darms-Landolt, Davaz, Della Vedova, Dermont, Dosch, Dudli, Engler, Fasani, Felix, Gasser, Grass, Gunzinger, Hardegger, Hartmann (Champfèr), Hartmann (Cuira), Hitz-Rusch, Jaag, Jenny, Joos, Kappeler, Kasper, Kleis-Kümin, Koch (Tumein), Koch (Igis), Kollegger (Cuira), Kollegger (Malix), Krättli-Lori, Kunz (Fläsch), Locher Benguerel, Lorez-Meuli, Märchy-Caduff, Meyer-Grass, Michael (Donat), Michel, Montalta, Müller, Nick, Niederer, Niggli (Samedan), Papa, Parolini, Parpan, Pedrini, Pfäffli, Rathgeb, Righetti, Rosa, Steck-Rauch, Stiffler (Tavau Plaz), Stiffler (Cuira), Tenchio, Thöny, Tomaschett-Berther (Trun), Valär, Vetsch (Claustra Vitg), Vetsch (Pragg-Jenaz), Waidacher, Zanetti, Zweifel-Disch, Monigatti, Scartazzini
Resposta da la regenza
Cun la preschenta incumbensa vegn la regenza envidada da suttametter al cussegl grond uschè svelt sco pussaivel in rapport cumplessiv davart la situaziun actuala e futura da l'energia electrica sco er davart la posiziun dal chantun areguard las finamiras e la strategia da la politica d'electricitad dal Grischun.
La regenza è er da l'avis che l'ambient e che las sfidas da la politica d'electricitad dal Grischun èn sa midads essenzialmain dapi l'ultim rapport cumplessiv da l'onn 2000. En emprima lingia sto vegnir menziunada la catastrofa tragica en il Giapun. Las consequenzas correspundentas ston vegnir examinadas en moda cumplessiva er en vista a la politica d'electricitad dal Grischun. Ils pass che vegnan menziunads en l'incumbensa (entrada en vigur da la lescha federala davart il provediment d'electricitad, la legislaziun adesiva chantunala latiers, la problematica da CO2, il svilup da las energias regenerablas, il potenzial en il martgà d'electricitad, la nova societad naziunala per la gestiun da la rait), dentant er l'indemnisaziun per cuvrir ils custs da la furniziun d'electricitad (ICF) che la confederaziun ha fixà per promover las energias regenerablas sco er las tractativas ch'èn en curs tranter la Svizra e l'Uniun europeica sin il champ da l'electricitad han pia stgaffì ils ultims 10 onns novas cundiziuns generalas che pretendan in vast urden da preschentaziun concernent l'electricitad sco er ina nova analisa da la situaziun.
La regenza è perquai pronta d'acceptar l'incumbensa e da preschentar il rapport giavischà.
04 d’avrigl 2011