En la resposta da la regenza a la dumonda Bondolfi concernent il traffic da transferiment pervia da la sanaziun dal tunnel da via tras il Gottard conferma il departament federal per ambient, traffic, energia e communicaziun (DATEC) che dumondas davart il manar il traffic durant las lavurs da renovaziun èn – ultra da las dumondas da la tecnica da construcziun – decisivas per tscherner la varianta.
Ina da las variantas è la construcziun d'in segund tunnel tras il Gottard.
La construcziun d'in segund tunnel da via tras il Gottard vegniss a distgargiar massivamain il chantun Grischun dal traffic supplementar, cun il qual i vegn fatg quint durant la fasa da sanaziun dal tunnel da via existent tras il Gottard.
Pervia da quai vegn la regenza envidada da s'engaschar tar la confederaziun ch'in segund tunnel da via tras il Gottard vegnia construì.
Cuira, ils 16 da favrer 2011
Nick, Barandun, Bezzola (Samedan), Bezzola (Zernez), Burkhardt, Casanova-Maron, Claus, Clavadetscher, Engler, Fontana, Furrer-Cabalzar, Giacomelli, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jenny, Kasper, Krättli-Lori, Kunz (Fläsch), Kunz (Cuira), Marti, Niggli (Samedan), Perl, Pfäffli, Rathgeb, Rosa, Steck-Rauch, Stiffler (Cuira), Troncana-Sauer, Valär, Vetsch (Pragg-Jenaz), Waidacher, Wieland, Scartazzini
Resposta da la regenza
Il december passà ha il departament federal per ambient, traffic, energia e communicaziun (DATEC) preschentà in rapport cumplessiv dal cussegl federal per sanar il tunnel da via tras il Gottard. En discussiun stattan duas variantas da sanaziun che sa differenzieschan areguard ils temps ed areguard la durada che l'axa dal Gottard è bloccada. En quest connex vegni fatg quint che la finamira da spustar il traffic pesant da la via sin la viafier saja cuntanschida cumplainamain fin che las lavurs da sanaziun vegnan prendidas per mauns e ch'il traffic supplementar restant sin las axas alternativas possia vegnir responsà. La construcziun d'in segund tunnel tras il Gottard na vegn betg pli persequitada vinavant per motivs giuridics, finanzials e da temp.
A chaschun da las ultimas bloccadas da l'axa dal Gottard pervia d'accidents e pervia da crudada da crappa èsi sa mussà ch'igl è problematic d'engrevgiar la ruta dal San Bernardin cun ses dus vials per ina perioda pli lunga cun in traffic supplementar pli grond, en spezial per motivs da la segirezza, pervia dal cuntertraffic, pervia da l'autezza, pervia da las grondas pendenzas e pervia da las stortas stretgas sco er pervia da las paucas pussaivladads da surpassar.
La regenza ha explitgà a la scheffa dal DATEC, cussegliera federala Doris Leuthard, differentas giadas sias resalvas concernent las variantas da sanaziun ch'il cussegl federal preferescha, concernent il cuntanscher las finamiras da spustar il traffic e concernent l'adattaziun da las axas grischunas sco axas alternativas.
Sco ch'ins è gia vegnì a savair da las medias sustegna la regenza las pretensiuns dals chantuns Tessin ed Uri da construir in segund tunnel tras il Gottard. Da princip vul ella sustegnair ses chantuns da muntogna vischins directs e sa mussar solidarica cun lur giavischs, sche quels èn cumpatibels cun ils interess dal Grischun. Quai fiss il cas tar la construcziun d'in segund tunnel tras il Gottard perquai che quai conferma il giavisch dal Grischun da s'engaschar consequentamain per che las vias en noss chantun che traversan las Alps na stoppian betg surpigliar – pervia da la sanaziun dal tunnel da via tras il Gottard actual – bler dapli traffic supplementar, en spezial nagin traffic pesant supplementar. Cun construir in segund tunnel tras il Gottard dastgass quest giavisch schizunt vegnir ademplì il meglier, er sche la confederaziun stuess bloccar l'axa dal Gottard per quest intent, e quai per pudair exequir mesiras transitoricas vi dal tunnel existent tras il Gottard.
En il senn da las intervenziuns d'enfin ussa tar la confederaziun ed en correspundenza cun il giavisch da l'incumbensa da la fracziun da la PLD vegn la regenza a s'engaschar vinavant ch'i vegnia construì in segund tunnel tras il Gottard resp. ch'i vegnia tschernida ina soluziun che chaschuna uschè pauc traffic supplementar sco pussaivel sin las axas grischunas da transit dal nord al sid. Sch'i na vegn betg construì in segund tunnel tras il Gottard pretenda il chantun Grischun oravant tut ina contingentaziun dals viadis da camiuns sin la ruta dal San Bernardin sco er ina soluziun da sanaziun che permetta da duvrar il tunnel da via tras il Gottard durant l'enviern. La regenza è pia pronta d'acceptar questa incumbensa.
30 da mars 2011